El Conceyu de Carreño, con una ayuda concedida del programa LEADER convocatoria para l'añu 2018, anovó l'equipamientu informativu del Centru de Dinamización Tecnolóxica Local CDTL C@rreño Digit@l (antiguu telecentru). La inversión xubió a 35.077,9 € y cuntó con una subvención de fondos europeos de 16.195,64 €, concedida pola Asociación para'l Desenvolvimientu Integráu Periurbano d'Asturies (ADICAP), que xestiona na contorna los fondos LEADER.
Esta inversión municipal incluyó la renovación con equipos d'última xeneración, qu'inclúin amás 4 ordenadores dotaos de meyores n'accesibilidá para les persones con diversidá funcional.
“Concretamente, estos equipos tán dotaos de pantalles de mayor tamañu y resolvimientu, lo mesmu que de teclaos afechos para persones con discapacidá visual, con tecles de gran tamañu y altu contraste, y ratones de tipu trackball, afechos para aquelles persones con problemes motores nes estremidaes cimeres” – esplicó Roberto Bueno, edil d'innovación.
Estos nuevos equipamientos tán allugaos na primer planta del Centru Polivalente, totalmente accesible para persones con problemes de movilidá, de forma que toles persones puedan utilizar los servicios qu'empresta'l Centru de Dinamización Tecnolóxica Local, tales como talleres formativos, usu asesoráu de equipamientu TIC, etc...
“Con esta renovación, el Conceyu de Carreño va ameyorar el serviciu qu'empresta al vecinderu, coles mires de que la ciudadanía carreñense tenga un fácil accesu a les funcionalidades de l'Alministración Electrónica, y amás poniendo especial enfotu en que les persones con diversidá funcional nun queden marxinaes nel usu de les Nueves Tecnoloxíes de la Información. D'esta miente, el Conceyu de Carreño va llevar a la práctica la Inclusión, tamién nel ámbitu de les TIC. Selmanalmente alleguen al nuesu CDTL persones del Centru de Sofitu a la integración de Candás” – prosiguió Bueno.
“Gracies a esta ayuda europea, vamos abrir una nueva etapa na yá llarga y esitosa trayectoria del CDTL de Carreño. Nacíu en 2000 como unu de los primeres Telecentros d'Asturies, esti equipamientu contribuyó poderosamente a la incorporación de la población de Carreño a la Sociedá de la Información. Delles cifres faen patente l'interés del públicu polos servicios del CDTL: en 2018 cuenta con un total de 5.876 usuarios/es en rexistru (lo que supon un 55,72 % del vecinderu del conceyu de Carreño usen estos servicios y equipamientos tecnolóxicos). No que va d'añu'l CDTL ufiertó 29 talleres de formación presencial, y un total de 620 servicios d'asesoramientu individualizáu a la población local” – concluyó'l conceyal.
Albandi
