L'audiovisual va ser una de les pieces de la campaña de promoción turística del conceyu de Carreño en 2019. Prevese la so presentación oficial na Feria Internacional de Turismu.
“Aquellos valores que cualquier persona identifica con Candás y con Carreño; simpatía, hospitalidá, allegría, pónense en xuegu nesti vídeuclip promocional. Esti proyectu promocional y collaborativu yien como protagonistes a la poeta murciana Madalena Sánchez Blesa y al músicu del candasín Pipo Prendes. Va munchos años que se conoz el potencial del audiovisual y les nueves tecnoloxíes como elementos indispensables pa la promoción turística de calidá, vehiculada al traviés d'un soporte fílmicu que remembre emociones. Ésti que se ta rodando nel nuesu conceyu, a costos bien razonables, al tener la collaboración desinteresada de los sos protagonistes y al realizalo con una productora local "Menganos Producciones"- allugada na Residencia Empresarial municipal EnPrendes- va convidar a conocer esti conceyu y a esfrutar de los sos enclaves y la so xente.” – esplicó l'Alcaldesa, Amelia Fernández.
A iniciativa de la Conceyalía de Turismu del Conceyu la productora "Menganos Producciones", qu'integren los xóvenes, Cristian del Hoyo, Productor Audiovisual, realizador d'audiovisuales y espectáculos, y Diego Martin, responsable de grabación, edición y postproducción, rueda na villa marinera. Como filo conductor el poema de Madalena “Si me dejo corazón fuera” y la música d'un gran embaxador del nuesu conceyu, Pipo Prendes. La biblioteca municipal “ González Posada” , el teatru Prendes y la sablera de Candás son dalgunes de les localizaciones previstes.
“L'audiovisual ta fechu dende'l corazón de los sos protagonistes. Y va dexanos esplicar el nuesu destín al mundu por que viaxeros y viaxeres conozan la esperiencia de visitanos. Les imaxes son un elementu bien potente y diferenciador que nos dexarán amosar la guapura y les característiques que nos faen singulares” – añedió Fernández.
Madalena Sánchez Blesa, nació en Puerto Lumbreras (Murcia) en 1970, estudió Filoloxía Hispánica y Arte Dramático, ye amás Actriz y productora de Cine, rexenta un restorán y amás de too esto ye Poeta, publicó cuatro llibros hasta la fecha “Cosas de Niña”, “Yo Contra mí”, “Nana para Dormir a lmis abuelos” y “Instrucciones a mis hijos”. Escribe dende los ocho años, cuando perdió al so pá y este foi la manera que tuvo pa enfrentase a ello nesos momentos. La poeta saltó a la fama cuando grabó un videu recitando'l so poema “Instrucciones a mis hijos” y el videou viralizóse, anque yá grabara dalgún otru videu de gran repercusión na redes esti foi'l que más s'estendió, agora ye conocida inclusive en Suramérica, tamién comparte colos sos siguidores de Facebook les esperiencies, dende un puntu de vista lluchador, que'l cáncer de mama fíxo-y travesar, contra'l qu'engarró y venció. Madalena considérase “poeta de ceres y de patios” y realiza recitales en colexos, llibreríes ya inclusive en cárceles, que como afirma, pa ella los más importante ye la cercanía cola xente.
Pipo Prendes nació en Candás en 1.956 y lleva tola vida cantando y faciendo cantares; editó 15 discos, canta dende'l so sentir marineru, con esencia de boleros, fados, tangos y copla, que engarza na so peculiar voz. Nos sos directos, nos espacios curtios, atópase bien a gustu; colos sos músicos tien esa complicidá que nel escenariu faise notar dende'l primer momentu y cola so guitarra, a soles, llega al corazón dende l'autenticidá. Títulos como "Un paso más", "Respiro", Bailarina", "Asturianos" son representativos de la so llarga trayectoria musical.
Arxentina, Perú, Panamá, Cuba, Francia, Alemaña, Bélxica, Italia, (onde grabó'l so primer discu), son países onde Pipo Priendes cantó, como sigui faciendo pola xeografía española y lóxicamente pela so tierra, Asturies. Les sos collaboraciones en medios de comunicación son bien destacaes, como lo ye la del Himnu del programa radiofónicu "PROTAGONISTES" empobináu pol míticu periodista Luis del Olmo y que Pipo compunxo, Onda Pesquera de Jesús Ferreiro, la radio de la mar y un llargu etcétera. Dende'l so maduror interpretativu atópase como pez na agua al pie de Magdalena Sánchez Blesa, con cantares como “SI HE DEJADO EL CORAZÓN FUERA” de que'l so testu ye autora la magnífica poeta y que'l cantautor candasín musicó. Xuntos esbillen poesía y música d'intensidá.
Albandi
