El próximu xueves 11 de mayu a les 19:00 hores va
tener llugar na Casa de la Cultura de Candás l'actu de Clausura de
los CURSOS d'ESTENSIÓN CULTURAL, cursu 2016-2017, que promueve
el Conceyu de Carreño al traviés de la Conceyalía de Cultura.
Cuando'l domingu eche'l zarru definitivamente a la
Esposición de los trabayos realizaos pol alumnáu de “los cursos”,
qu'estos díes podemos esfrutar na Casa de la
Cultura, ufiertaríense un total de 37 acciones formatives
de 18 temátiques distintes. Aumentando la ufierta de cursos y places
pa persones de toles edaes (555 places dende la Conceyalía de
Cultura).
“L'oxetivu d'estos cursos, y el nuesu oxetivu,
ye promover la participación social, la educación, la formación y
la cultura, y ameyorar la calidá de vida de les persones nel ámbitu
municipal” señaló Cecilia Tascón- Conceyala de Cultura.
Diversificaríase la ufierta pa tolos colectivos.
Intentando averar la ufierta formativa a un colectivu más ampliu de
persones. Como ye'l casu de la mocedá. Y, per tercer añu
consecutivu, caltúvose la ufierta pa persones con diversidá
funcional.
La temática de los cursos foi amplia y variada,
asina por casu atopamos con cursos dedicaos a la recuperación de la
cultura tradicional: Danza prima y cancioneru candasín, según
confección de cobertores candasinos o pasando polos clásicos de
Cocina, Cerámica pa persones adultes, Cueru, Artesanía Decorativo,
Talla de Madera. O nuevos anguaño como Escritura Creativo o Telar.
Amás ufiertóse una mayor amplitú d'horariu.
Atendiendo a los pidimientos de la ciudadanía programáronse cursos
n'horariu de mañanes. La programación d'anteriores ediciones
concentróse nes tardes. Nesta edición ufiertáronse 5 acciones
formatives na vez de mañana, cola intención dar oportunidaes a
persones que, por circunstancies personales, nun pueden allegar de
tarde.
Nel actu de Clausura a les persones asistentes a
los cursos, y que primeramente lo solicitaron, va faése-yos
entrega d'un diploma acreditativu de la so asistencia a los mesmos. Y
mientres l'intre del actu l'alumnáu del cursu de Danza Prima y
Cancioneru Popular Candasín va ufiertar a les persones ellí
rexuntaes una demostración de los cantares que tolos miércoles
entonen nel Centru Polivalente “ La Baragaña” de Candás so la
dirección de María Esther Vega.
“Va Ser la segunda vegada que l'alumnáu del
cursu de Danza Prima y Cancioneru Popular Candasín amuese
públicamente'l so bon quefer. La primer ocasión tuvo llugar
mientres la ponencia presentada pol cantautor candasín Pipo Prendes,
y el director de la Escuela Municipal de Música “Miguel Barrosa”
David Colado, “Cantares de la Bodega. L'Habanera dende Candás”,
dientro del III Congresu Internacional de l'Habanera celebráu en
Candás esti iviernu. Son un grupu de persones, que como ellos mesmu
dicen, nun sabemos de música, nun tenemos formación académica nesi
ámbitu, pero gústanos cantar y danciar. Amás nun queremos escaecer
nin perder toes aquellos cantares que se cantaben nes
bodegues” comentó Tascón.
La Esposición de los trabayos realizaos pol
alumnáu podrá visitase hasta'l domingu 14 de mayu, na Casa de
la Cultura de Candás ( cai Santolaya 9). Siendo l'horariu:
De llunes a
sábadu de 19:00 a 21:00 hores.
Domingos y
festivos de 12:00 a 14:00 hores y de 18:00 a 21:00 hores.
Albandi
