Van empezar les obres de renovación y
meyora de la rede de redistribución d'agua nel barriu de La
Estaquera, na parroquia de Perlora.
Col fin de resolver los problemes de la
zona, proxéctase la renovación de la rede con tubería de
polietileno de 75 y 50 mm de diámetru, anulando'l tramu de tubería
de fibrocementu esistente. Esta obra, tres el correspondiente
procedimientu de contratación, foi axudicada a la empresa Gulías
Hermanos y Construcciones, S.L. por importe total de 75.504 €
IVA incluyíu.
“Dicha actuación, demandada pol
vecinderu, forma parte d'un plan de renovación y meyora de los
suministros d'agua potable a les parroquies rurales del Conceyu,
que'l Ayuntamientu de Carreño ta llevando a cabu p'ameyorar la
calidá de los suministros y sobre toos les sos característiques de
caudal y presión, anguaño deficientes en dellos barrios del
Conceyu” – señaló Manuel Noceda, edil de zona rural.
“Hasta agora, el barriu de la
Estaquera, en Perlora, taba siendo abastecíu al traviés d'una
tubería de fibrocementu, obsoleta y d'escasa sección hidráulica
(50 mm de diámetru), lo que causaba problemes de caudal y
principalmente de perda de carga na zona “ – señaló'l conceyal.
“Estes dificultaes nel suministru
d'agua agrávense na estación de branu pol aumentu de los consumos,
por casu, en viviendes estacionales, más riego, etc y les
mayores perdes de carga. Por toes estes circunstancies convenía'l
cambéu de medría de sección de les tuberíes esistentes” –
añedió'l conceyal.
Plantégase la renovación de la rede
na cera esquierda de la carretera AS-239 sentíu escontra Xixón,
dende l'encruz col camín que da accesu a la estación de Perlora
hasta l'encruz col camín de Arroyo del Mar (C-235) Estaquera,
Perlora.
El númberu de viviendes afectaes directamente nel tramu d'obres ye de 30 con una población envalorada
de 90 persones, con un aumentu estacional pol branu que puede doblar
la población.
Les actuaciones inclúin el treslláu
de les acometíes a la nueva rede puesta en serviciu, incluyíu'l
treslláu de contadores asitiaos davezu nel interior de les viviendes
a les llendes de les parceles, agospiaes n'armarios de formigón
prefabricáu, cola renovación de les acometíes domiciliaries cuando
sía necesariu.
“Les acometíes, dende la llave
esistente na vía o camín públicu van realizase con tubería de
polietileno 32 mm./10 atm., a salvo de casos concretos en que fuera
necesaria una sección mayor pola esistencia d'esplotaciones
ganaderes, naves industriales o otres instalaciones que precisen un
suministru mayor” – añedió'l conceyal.
“El contador de cada vivienda va
treslladase a caseta prefabricada de formigón normalizada de 33x48
con puerta de PVC y visor de metacrilato pa la llectura; antes del
contador asitiaráse llave de corte ¾, salvo los casos indicaos
enantes. Los elementos de conexón del contador (xuntes, racores,
etc.) van anovase tamién. El tramu de conducción ente l'antigua y
el nuevu allugamientu del contador, va anovar con tubería de
polietileno de 25 mm./atm” – concluyó Noceda.
Albandi
