Abiertu'l plazu de solicitú pa los güertos públicos municipales

Dende güei, llunes  4 de marzu, hasta'l próximu 28 inclusive, el Conceyu de Carreño tien abiertu'l plazu d'inscripción pa poder optar a l'axudicación de los primeros 16 Güertos Públicos Sostenibles Municipales.

“Ufiertar un espaciu d'esparcimientu aptu pa l'actividá hortícola, promover una ocupación saludable y la recuperación d'espacios urbanos pa usu púbicu y de variedaes agrícoles autóctones son dalgunos de los oxetivos de la creación d'estos Güertos. Una propuesta que cuntó col respaldu políticu de SOMOS Carreño y el grupu socialista.  Estos espacios que s'habilitaron van fomentar la participación ciudadana y el desenvolvimientu sostenible xenerando espacios de biodiversidá nos que promover bones práctiques ambientales de cultivu, una alimentación sana y un cambéu nos vezos escontra unos más saludables” rellató Cecilia Tascón, edil d'urbanismu de Carreño.


“Los “Güertos” cunten con un reglamentu de funcionamientu nel que se regula dende les normes d'usu, derechos y obligaciones de los y les usuaries, los horarios, los compromisos del Conceyu hasta les posibles prohibiciones y el procesu sancionador nel casu de non cumplir col mesmu. La mayor parte d'ellos tán destinaos al usu priváu por aciu una concesión temporal, acútase amás un güertu d'usu escolar dientro de la cortil abarganada na zona conocida como a Llamarga, y otru d'usu colectivu empobináu a persones con discapacidá. Polo que van poder aportar al usu de los “Güertos” toes aquelles persones vecines de Carreño mayores d'edá que figuren inscrites nel padrón municipal d'habitantes con una antigüedá mínima d'un añu; les entidaes ensin ánimu d'arriquecimientu del Conceyu que lleven más d'un añu inscrites nel padrón municipal d'asociaciones; los centros socioeducativos, concediéndose un únicu “Güerto” por familia o por entidá” señaló la edil.

“Otra de les condiciones necesaries pa optar a estos espacios ye nun tener terrenes nel conceyu susceptibles de ser cultivaos. Amás los y les axudicatarios van tener prohibío vender los productos llograos nes parceles públiques, van tar destinaos al consumu familiar. Tampoco van poder usase productos químicos nin podrá modificase el trazáu orixinal de les parceles” siguió la responsable de la área.

“Estos primeres 16 “Güertos” dispónense sofitaos nos caminos col fin de tratar d'alteriar al mínimu la topografía de la parcela. Van Tener un superficie ente los 35 y los 50 metros cuadraos. Por cuenta de la orografía del terrén dispónense en bancales que van facilitar les de llabores de trabayu y movilidá, con una diferencia máxima d'altor ente ellos de 55 cm. Esti escalonamientu resolvióse con unes chapes metáliques fincaes nel terrén. Cada unu d'ellos cunta con un grifu con un contador individual conectáu a una arqueta” prosiguió Tascón.

Dende güei llunes 4 de marzu hasta'l xueves 28 de marzu podrán realizase les inscripciones de dos formes:

·         PRESENCIAL nel rexistru del Conceyu asitiáu na cai Santolaya, 1-3 de Candás nel horariu llunes, miércoles, xueves y vienres de 9:00  a 14:00 hores y los martes de 9:00 a 18:00 hores.

·         ONLINE, al traviés de la see electrónica de la web oficial del Conceyu de Carreño, na opción habilitada pa la tramitación Güertos Públicos Sostenibles. Nesti casu va ser necesariu identificase por aciu el certificáu dixital pa la so tramitación, y poder descargase la documentación.


En dambes opciones les persones comenenciudes tendrán de cubrir una solicitú acompañada de la documentación que se solicíita. Xuntu cola solicitú apurrirá'l Reglamentu de Funcionamientu de los Güertos Públicos Sostenibles según un planu de localización de les parceles.


Descarga equí'l PLANU ónde pueden vese los allugamientos de los GÜERTOS MUNICIPALES https://sedeelectronica.ayto-carreno.es/siac/Publicacion_ver_doc.aspx?coddoc=INF13I02Y&díi=2701

“L'axudicación y distribución de les parceles va faese por concursu de puntos, axudicándose una única parcela por sortéu a cada solicitante pal so cultivu. L'axudicación pol criteriu de puntos va rexir por un baremu de puntos ente los que hai que destacar: por permanencia nel manifiestu d'interés 4 puntos; por ser mayor de 65 y menor de 30 años 1 puntu; por tar na situación de desempléu la persona que la solicita 1 puntu. Siendo esta por un plazu máximu de 4 años naturales prorrogables” remató la Conceyala.