Esti sábadu 30 de marzu, Perlora acoyó la séptima función de la XIV “Ronda de Teatru” per Carreño. Esta actividá encuádrase dientro de la programación que dende les distintes Conceyalíes desenvuévese col oxetivu d'averar la cultura a tol territoriu del Conceyu. 

Les rises y les sorrises reinaron nel pabellón Braulio Suárez de la mano de la Compañía Asturiana de Comedies que va representó "Caxigalines", pero primeru'l públicu aistente pudo esfrutar del humor y de bon faer del grupu de teatru local “Les Ayalgues” de Carreño colos sos monólogos. 

Cola dirección de Sergio Buelga, la Compañía Asturiana de Comedies interpretó “Caxigalines”, trés sainetes/entremeses, trés amueses inconfundibles del calter asturianu nel qu'al traviés de la gracia, la socarronería y dulzura de los sos tipos y situaciones reflexen costumes, que pese a la meyora tecnolóxica siguen tando presentes na sociedá asturiana y que faen que queramos, si quepe, un pocu más a la nuesa tierra. 

La Compañía Asturiana de Comedies ye'l grupu teatral más antiguu que güei sigue desenvolviendo la so actividá n'Asturies. Empieza la so andadura a finales de la primer década del sieglu XX, años nos que se dedica a representar obres d'autores costumbristas por casu como Pachín de Melás. Nos años 50 vivió la so dómina dorada con actuaciones por toa España y con un viaxe a América con representaciones en Cuba, Rep. Dominicana y Puertu Ricu. Con actuaciones diaries nos principales teatros de Xixón.

Nos setenta sufrió un parón que fixo adormilitiar les sos habituales representaciones, pero a partir de 1986 vuelve resurdir cola idea de siguir calteniendo vivu'l deséu de nun perder una costume, una tradición tan popular como ye'l teatru asturianu.

Fueron la primer compañía, xuntu col GT “Xana” de Perlora, el GT “L'Horru” de Barcía y GT de Tapia de Casariego que participaron nel I Salón de Teatru Costumbrista Asturianu de Candás nel mes d'abril de 1991. Dende esa fecha nun faltó a la so cita añal nel Teatru Prendes. Prueba d'ellos ye que na pasada edición fueron galardonaos con trés de los Premios qu'otorga'l Salón pola so actuación del clásicu “Nieve nel Puertu”. D'esta forma Manuel F. Rodríguez recibió'l Premiu Aurora al meyor actor masculín; ente que'l meyor secundariu foi'l so compañeru Armando Felgueroso; y nel apartáu femenín Pili Ibaseta foi escoyida como la meyor actriz.

Pela so parte, “Less Ayalgues de Carreño” ye un grupu de muyeres del Conceyu de Carreño qu'en participando nun taller de iniciación al teatru dientro del programa rexonal “Tiempu Propiu”, afayaron el so interés poles artes escéniques. Solicitando a la Conceyalía d'Igualdá l'impulsar una actividá teatral pa elles nel Conceyu. Asina empezaron un taller de teatru cola profesional asturiana Xema de Luis. D'ende surdió la creación del so grupu de teatru. Les Ayalgues ta formáu por dieciocho actrices llenes de vitalidá ya iniciativa, que dende va años percuerren Asturies representando obres teatrales y monólogos nes que tresmiten la cultura y la llingua asturiana. Na actualidá siguen ensayando na Casa d'Alcuentros de Candás y tán somorguiaes na preparación d'una nueva obra teatral. L'adaptación d'una gran obra teatral de los años trenta y cuarenta del sieglu XX.