El Conceyu de Carreño dispón d'un Plan contra la Probeza Infantil frutu del conveniu robláu pola Conseyería de Servicios y Derechos Sociales del Principáu d'Asturies y el mesmu consistoriu.

Les competencies en materia d'infancia correspuenden a les Comunidaes Autónomes, implementando éstes nun 25,38 % la subvención que llega del Gobiernu Central, apurriendo les alministraciones locales, los Conceyos, la xestión  de los programes.

Dientro d'esti Plan, 17 families del Conceyu, con menores a cargu, podrán beneficiase d'unes ayudes de 700 € caúna. Esta cuantía afítase atendiendo a les propuestes de UNICEF en relación a la cuantía mínima que tien d'axustase pa les prestaciones por fíu/a a cargu. 

“Los Servicios Sociales municipales van ser los encargaos de xestionar estes midíes de protección infantil de sofitu familiar na so modalidá de prestación económica, que la so finalidá ye procurar que les necesidaes básiques del/la menor tean cubiertes cuando la causa determinante del riesgu pal so desenvolvimientu integral venga de situaciones de falta o insuficiencia de recursos del so mediu familiar. Como novedá d'esta nueva convocatoria si'l númberu d'unidaes familiares solicitantes que cumplen con  tolos requisitos ye mayor a diecisiete, la Comisión de Bienestar Social va poder determinar el cambéu de la cuantía, prorrateando la cantidá global, 11.900 €, ente les families solicitantes propuestes” señaló Paula Cuervo, Conceyala de Bienestar Social.

Dende l'área de Bienestar Social municipal va llevarse a cabu la concesión d'estes ayudes económiques directes a families o unidaes de convivencia con menores a cargu, siempres qu'esista una convivencia afeutiva y los proxenitores nun fueren privaos o suspendíos de la patria potestá y confírmese que la unidá familiar atópase en situación de privacidá material severa. La valoración de les solicitúes va faese atendiendo al indicador propuestu pola Unión Europea, AROPE. Les families tendrán de tar per debaxo d'esti indicador, que combina trés conceutos: el riesgu de la probeza, la falta material y baxa intensidá nel empléu.

“Va Beneficiar, poro, a unidaes familiares que nun puedan faer frente a los gastos ordinarios como: alimentación, vistíu, suministros xenerales de la vivienda y material escolar, siempres que la renta máxima añal de la unidá familiar nun supere la última cuantía fita pol INE como de riesgu de probeza. El cumplimientu de los requisitos anteriores va acreditase por aciu informe de los Servicios Sociales” esclarió la Conceyala.

El plazu de presentación de les instancies va ser de 10 díes a cuntar a partir del día siguiente a la publicación d'esta convocatoria nel Boletín Oficial del Principáu d'Asturies (BOPA). Pa ello les unidaes familiares interesaes n'aportar a estes ayudes tendrán de presentar la solicitú en modelu normalizáu, xuntu cola documentación acreditativa de la so situación nel Centru de Servicios Sociales Municipal de Carreño asitiáu na cai Nicanor Piñole, 1; nel Rexistru Xeneral del Conceyu de Carreño, sito na cai Santolaya, 1-3; o en cualesquier de los llugares previstos nel artículu 16.4 de la Llei 39/2015, de 1 d'ochobre, de Procedimientu Alministrativu Común de les Alministraciones Públiques.

Pa la concesión de les ayudes, caúna de les families axudicataries va tar obligada a la firma d'un documentu de compromisos, previu a la concesión, onde se va reflexar los conceutos nos que se va a gastar l'ayuda. La xustificación va faese en base a los recibos o factures rellacionaes colos conceutos indicaos nel documentu robláu.