Esti fin de selmana, la Coral “Aires de Candás” xuntu col Grupu de Técnica Vocal de la Escuela de Música Municipal “Miguel Barrosa” de Candás  fueron convidaos a participar en dos conciertos, na Catedral de Santa María de l'Almudena de Madrid y na Ilesia de San Antón, de la mesma ciudá.

El domingu, 31 de marzu, a les 20:00 hores na catedral de “La Almudena” so la dirección musical de David Colado Coronas van participar nel Conciertu de Cuaresma 2019” col Oratoriu Yohanan. Esti Oratoriu ye una obra en dos actos, que con llibretu d'Antonio Quesada Hurtado y música del compositor Aurelio Martínez López rellata aquellos pasaxes fundamentales conteníos nel Evanxeliu de San Juan sobre la Pasión, Muerte, y Resurrección de Xesucristo.

Estrenóse nel 2011 nel marcu de la celebración de la Selmana Santa de Torrevieja. Y a lo llargo d'estos años, foi representada, coincidiendo neses feches tan señalaes pa los católicos, en Orihuela, Vera (Almería), y en San  Miguel de Salinas (Alicante).  Gracies a la unión de les voces y al esfuerzu de les corales  “Aires de Candás” y “Villa Blanca” de L.luarca xuntu col Grupu de Técnica Vocal y l'Orquesta Sinfónica de la Escuela Municipal Carreñense, l'Oratoriu Yohanan, foi interpretáu en dos ocasiones n'Asturies.  La primera en Candás, na Ilesia Parroquial de San Félix, dientro de los actos musicales de la Selmana Santa Candasina nel 2017. Y el marzu del añu pasáu na Ilesia Parroquial  de Santolaya de L.luarca. Un mes más tarde, n'abril del 2018, esti grupu d'amantes de la música treslladóse a Torrevieja pa volver interpretar de nuevu'l “Yohanan” xuntu a dos corales d'Alicante.

Pal conciertu d'esti domingu cunta cola unión de cinco corales que van sumar más de cien voces, amás de la participación de cinco solistes. Van Tar presentes la Coral “Villa Blanca” de L.luarca;  la Coral “Alcores” de San Miguel de Salinas, Alicante; Coral Colexu “La Purísima”  y el Coru “Ricardo La Fonte” de Torrevieja, Alicante;  y la Coral Polifónica “Aires de Candás”.

L'acompañamientu musical, so la dirección de David Coláu Corones, Director de la Escuela Municipal de Música “Miguel Barrosa” de Carreño va tar al cargu de la Banda Sinfónica Infantil y Xuvenil del Principáu d'Asturies, que la so see atópase'n Carreño. Amás el mesmu compositor de la obra, Aurelio Martínez, va ser la persona encargada del órganu.

Pero como antoxana d'esti gran recital de música sacra, el sábadu 30  de marzu a les 19:00 hores, la coral candasina xunto la l.luarquesa y la Banda Sinfónica Infantil y Xuvenil del Principáu van ufiertar na Ilesia de San Antón (la Ilesia del Padre Ángel) el conciertu la Misa Gosspel-Brevis” de Jacob de Haan en llatín.

En representación del Conceyu acompañará-yos l'Alcaldesa de Carreño, Amelia Fernández López.