El PP lleva a Carreño a renunciar a mercar el Teatru Prendes

“El Teatru Prendes pudo mercase l'añu pasáu, sicasí l'actitú del PP de Carreño torgó materializar una operación que cumplía dos oxetivos, per un sitiu dexábanos avanzar na inversión nun equipamientu cultural para'l conceyu y por otru, disponer de los 65.000 euros al añu que supon el so arriendu, para otres inversiones. Güei, a pesar de que nun tenemos delda y dispongamos de dineru nos bancos, esta operación ye invidable”, manifestó Paula Cuervo, vocera del gobiernu local.

“Les consecuencies de nun formalizar la operación en 2018 llevaríennos anguaño a tener que computar l'importe de la so compra nel techu de gastu lo que supondría un mayor incumplimientu de la estabilidá presupuestaria a 31 d'avientu de 2019 y anque disponemos de más dineru nos bancos, llevaríanos  a la necesidá d'afaer los gastos retayando la prestación de servicios o amontando la carga impositiva en Carreño”, añedió la vocera.

“Incumplimos estos parámetros  d'estabilidá por conxelar los impuestos, tases y precios públicos tola llexislatura, lo que supunxo unu amenorgamientu de los ingresos, y atendimos con un presupuestu prorrogáu, les meyores de personal, nun retayando servicios públicos, nin ayudes sociales nin subvenciones a entidaes del conceyu”, prosiguió Paula Cuervu.

“Ente que nun se modifique la norma qu'impunxo'l PP, los  conceyos que, como Carreño, l'añu pasáu fiximos los deberes y executamos inversiones sostenibles, anguaño vamos tar castigaos ensin poder usar el remanente y va tocanos conxugar el cumplimientu del Plan Económicu-Financieru (PEF) que s'apruebe nel plenu col aprovechamientu máximu de les posibilidaes qu'ufierta la Llei d'Estabilidá Presupuestaria”, esplicó la vocera socialista.

“La xestión económica del conceyu priorizó'l caltener l'equilibriu ente ingresos y gastos pa encarar la solución de los problemes reales del conceyu. La conxelación o amenorgamientu de la carga impositiva a les families y pymes son una amuesa d'esi compromisu, magar en 2018 esta midida al pie de los axustes salariales de la plantiya municipal, invirtió l'enclín de los últimos años”, concluyó la vocera.

Evolución de los ingresos y de los gastos:
   
AÑO

INGRESOS NON FINANCIEROS
GASTOS NON FINANCIEROS
2015
              14.815.956,14 €
      12.743.848,63 €
2016
              14.990.455,96 €
      12.878.057,93 €
2017
              14.157.515,41 €
      13.318.981,69 €
2018
              14.002.175,96 €
      14.455.376,30 €