El Conceyu de Carreño entama mañana vienres, día 29 de marzu, un homenaxe bien especial a les muyeres que trabayaron na pesca y la conserva.

Trátase de dos actividaes bien señalaes, que van conxugar l'homenaxe a la Muyer cola cultura marinera de Candás. A les 12 hores va tener llugar el descubrimientu oficial de la escultura “Homenaxe a la muyer redera”, fundida en bronce a partir d'un modelu orixinal de la ceramista candasina Rita Prendes, y darréu va baillase la danza prima, dirixida por María Esther Vega. L'actu va cuntar con una especial carga emotiva, cuidao que nél van participar cinco persones qu'exercieron l'oficiu de redera en distintes villes marineres asturianes, con toles que la entidá cultural “Candás Marinero” tuvo entamando actividaes d'alcuentru : María Luz Fernández Fernández (de Puertu de Vega), María Teresa Costales “Teté” (de Colunga), Aurelia Rodríguez Fernández (de L.luarca), José Francisco Argüelles Vega (de Lluanco), y Dominica Fernández “Ica”, la postrera redera n'activu de Candás, que foi apocayá distinguida como Muyer del Añu en Carreño.

Tres la inauguración de la escultura realizada pola Fundición Auriga d'Avilés (alcontrada nel entronque de les cais Valdés Pumarino y La Estrecha), va faese un pequeñu percorríu empuestu poles cais de Candás, p'afayar  l'Itinerariu didácticu pedagóxicu de los oficios de la mar de Candás, que la so señalización foi financiada (de la mesma que la escultura) pol Fondu Européu Marítimu y de Pesca.

A les 13 hores, nel Centru Polivalente “La Baragaña”, va empecipiase la Xornada “Oficios tradicionales de la Mar y la Muyer”, en que la so apertura va participar el Director Xeneral de Pesca Marítima, Francisco José González Rodríguez y l'Alcaldesa de Carreño, Amelia Fernández. Nesta xornada María José Carretero, de Fundación Mujer, va presentar l'estudiu “Muyeres de mar. Estudiu sobro la situación de les muyeres nel sector marítimu pesqueru d'Asturies”. De siguío, Dulce Mª Platero García (del Institutu Asturianu de Prevención de Riesgos Llaborales, IAPRL) va pronunciar la ponencia “Salú llaboral: Perspectiva de Xéneru nel sector pesqueru”. Tres estes ponencies, delles muyeres rellacionaes col sector de la pesca y la conserva van compartir les sos esperiencies vital y profesional: Ana Isabel Labad Cruz (“Anchoas Hazas”), Alejandra López García (“Conserves Remo”), y María Esther Vega y Telvina Menéndez, dambes xubilaes de la industria conservera de Candás. Va Presentar y va moderar la xornada la periodista Silvia Suárez.

Les actividaes d'esta xornada constitúin, ensin dulda, un finxu bien destacáu nes actividaes programaes pol Conceyu de Carreño nel so apueste pola visibilización del papel de la Muyer na sociedá y nel mundu del trabayu.