L'Asociación cultural femenina “LES AYALGUES DE CARREÑO” ta de celebración, una y bones el xueves 11 d'abril cumplen el so décimu aniversariu. Pa esta celebración programaron nun establecimientu de Perlora una comida de confraternización na que nun van faltar dellos monólogos, recitales de poesía, interpretación de cantares, ente otres actuaciones, la directiva de la entidá tien tou peracabáu pa festexar esta fecha tan señalada. La cita va ser a les 14:30 h, nel Hotel Piedra.

Lo qu'empezó como un meru pasatiempu nel añu 2009 con un simple “Taller de Iniciación al Teatru empobináu pola directora d'escena profesional Gemma de Luis. Actividá que demandaron al consistoriu en participando, dalgunes de les fundadores, nun taller de iniciación nel programa rexonal “Tiempu Propiu” convirtióse nun grupu consolidáu de teatru amateur. Ello foi posible gracies al enfotu y a la dedicación de les integrantes de “LES AYALGUES DE CARREÑO”. El grupu ta compuestu por diecisiete muyeres d'edaes entendíes ente los sesenta y los ochenta y ocho años, vecines del conceyu de Carreño (Candás y Albandi) y una integrante de Xixón.

“Les Ayalgues” perduró nel tiempu gracies a la constancia de les sos muyeres y cola collaboración de la área d'Igualdá del Conceyu, que-yos vence un aula en La Casa d'Alcuentru de les Muyeres de Carreño, onde semanalmente alleguen a ensayar, y fináncia-yos la formación teatral añal que-yos imparte la directora. El colectivu teatral yá allantó, con distintes obres, al públicu asturianu y siempre collechando un gran ésitu en toles actividaes realizaes.

A lo llargo d'esta década realizaron más de 10 espectáculos teatrales; N'interpretando escenes sueltes como “Coses que pasen” en 2011, “Muyeres a contra corriente” en 2012 o “Muyeres al timón” en 2013. Les Ayalgues” animóse con una obra completa, “El Calendariu”, escrita por J.R. Oliva, reconocíu dramaturgu asturianu al que'l consistoriu carreñense solicitó-y collaboración. Oliva, director del GT “Carbayín” de Siero, aportó a escribir la primer obra inédita especialmente pensada pa elles, “El Calendariu”. Estrenóse'l 20 d'agostu de 2014 nel Teatru Prendes de Candás que dirixe Alain J. Fernández. Abrieron con esta obra'l prestixosu salón Costumista de Teatru Asturianu llogrando dende entós una gran acoyida per parte del públicu. Darréu J.R. Oliva, siguió realizando obres como “Les Olimpiques” y “El Secretu de les Marañueles” pal grupu teatral.

Tamién participaron n'ensame d'eventos y actos de calter solidariu, como'l proyectu intergeneracional con mocedá “Te doy mis alas” y la Fundación Cruz de los Ánxeles, organización que trabaya con menores n'esclusió social. Actuaron ente otres organizaciones solidaries pa la AECC, Pueblu Saharagüi, Proyecto Hombre, etc. Ente otres activaes realizaron unos pequeños cameos en programes de radiu, televisión, fotografía, curtios, etc. Coles mesmes, esti grupu teatral alzóse con unu de los premios “Aurora Sánchez” 2014 a la meyor dirección y testu teatral nel Salón de teatru costumista que cada branu acueye'l Teatru Prendes de Candás. Cola representación que fixeron de “El Calendariu”, Gemma de Luis, llogró'l premiu a la meyor dirección pol so trabayu con “Les Ayalgues” y J.R. Oliva'l premiu al meyor testu costumbrista. Fueron tamién nomaes al premiu de meyor maquillaxe y vestuariu y al de meyor escenografía na mesma edición. Y amás participen na Ronda de Teatru rural de Carreño con monólogos.

Nel añu 2015, entorno los actos programaos pal 8 de Marzu'l Gobiernu del Principáu cuntó cola so collaboración. Esti colectivu de Carreño participó nel Teatru fórum autonómicu representando obra por diverses localidá asturianes (Teberga, Ayer, Illas, Sotu'l Barcu, Cangues d'Onís, Villayón, Amieva, etc)

Na actualidá “Les Ayalgues” de Carreño tán preparando un nuevu espectáculu teatral que constitúi tou un retu escénicu al tratase d'una obra de Federico Garcia Lorca. Que van estrenar nel mes d'Ochobre d'anguaño, coincidiendo cola actividá que va programar la área d'igualdá del Conceyu de Carreño pal Día Internacional de la Muyer Rural. Coles mires de dar un pasu más nel teatru interpretativu y utilizar el teatru pa sacar lo meyor de caúna. La idea ye amosar esti nuevu trabayu teatral nel mayor númberu d'espacios escénicos posibles y dir empuestes a por otra década más.

La Xunta Directiva de la ASOCIACIÓN CULTURAL FEMENINA “LES AYALGUES DE CARREÑO” ta compuesta pola Presidenta; Cheres Quintin, Vicepresidenta; Amelia Fernández, Secretaria; Emilia García, Tesorera; Maribel Rodríguez y como Vocales; Aidé García, Mercedes Escuderu, Caridad García y Mª Fe Suárez.