Esta actividá encuadrase dientro de la programación que dende les distintes Conceyalíes desenvuélvese coles mires d'averar la cultura a tol territoriu del conceyu.
Un allegáu púbicu enllenó l'escenariu escoyíu pa la representación teatral, l'aula didáctica del neolíticu. Risonderos monólogos qu'arrincaron rises y risaes del públicu asistente, pero tamién tiempu pa la reflexón sobro unu de les temes qu'anguaño más esmolez y carez una parte de la sociedá: el maltratu a la muyer.
Cellero empezó colos sos monólogos pa siguir darréu cola representación de Grupu de Teatru “Chanclos Asgaya”, cola obra "Una Muyer d’armes Tomar”.
Carlos Alba “Cellero” ye un actor, monologuista y narrador oral asturianu. Al traviés de los sos personaxes avéranos hestories d'humor con una espresividá cercana a la del xuglar, usando diversos recursos espresivos como'l versu o'l cantar, entemeciendo hestories antigües con otres actuales. Tien nel so haber el Premiu Fetén del añu 2015 a la meyor adaptación del testu por “Juan Soldáu”. Na última edición de los Premios OH de les artes escéniques d'Asturies llogró dos nominaciones, como autor y actor, por “Lázaro de Tormes”. Nel so haber concediéronse-y amás dos premios en reconocencia a la so trayectoria dientro del monólogu y el teatru asturianu. “El Anxelu” que concede'l Salón de Teatru Costumista de Candas y el Socorro Lin” que concede'l Grupu de Teatru “Carbayín” de Siero.
So la dirección de Segis Meana, la “Chanclos asgaya” interpretó la obra “Una Muyer d’ armes Tomar”, con autoría del propiu director. Un trés n'unu, un padre, un fíu y una nuera. Trés maneres de ver el mesmu problema: el maltratu a la muyer. Una obra llena d'humor ironía, diálogos de sordos pa un final… Risonderu y lliberador. El grupu nació nel añu 2006 por iniciativa de “Segis”, hasta esi momentu director del Teatru del Centru Asturianu d'Uviéu. Anque ye un grupu nuevu tien nel so haber, ente otros, el premiu al meyor actor nel Certame de Teatru d'A Veiga. Amás de dos “Premios Aurora” qu'añalmente concede'l Salón de Teatru Costumista de Candas. Na edición del añu 2015, alzóse cola estauína al Meyor Actor y na del 2013 al Meyor Testu Teatral. Mientres estos años actuaron en distintos puntos de la xeografía asturiana, como Uviéu, Carbayín, Llugones, A Veiga, Cangues d'Onís, Parres, Carreño,..
Albandi
