Nel marcu de la Mesa Intersectorial de Salú de Carreño'l Conceyu de Carreño programó la xornada formativa “Texendo Iniciatives Participatives” dirixíu aquelles persones qu'integren esti órganu interdisciplinar.
Cola organización y la impartición d'esta formación pretende dotase a los distintos axentes sociales de los calces y medios necesarios para una mayor participación activa, siendo esta una de les premises indispensables p'avanzar n'estilos de vida sanos y redolaes saludables.
El cursu, tres el procesu de llicitación correspondiente, va ser impartíu por “La Caracola, Iniciativas Sociales". El mesmu desenvolveráse a lo llargo del próximu mes d'ochobre, na modalidá de presencial. La duración del mesmu ta envalorada en 4,5 hores, estremaes estes en dos sesiones nes que se va trabayar ente otres temes:
• Revisión del oxetivu y funcionamientu de la Mesa Intersectorial de Salú de Carreño, dinamizándola y buscando el so afitamientu.
• Conocer los recursos comuñales esistentes ya incentivar la so participación.
• Conocer metodoloxíes de participación y esperiencies d'otres Meses Intersectoriales, amás de bones práctiques.
• Adoptar dinámiques más actives de participación.
Amás y como complementu, mientres el desenvolvimientu de les actividaes y talleres, va grabase un documental, a manera de pequeñu audiovisual, que va sirvir non yá como resume del cursu sinón tamién como base documental y que sirva de consulta al vecinderu.
Na llexislatura pasada Carreño xuntóse a la Estratexa de Promoción de la Salú y Prevención nel Sistema Nacional de Salú (SNS) coles mires de fomentar la salú y el bienestar de la población promoviendo redolaes y estilos de vida saludables y potenciando la seguridá frente a les mancadures. Nel marcu d'esta estratexa constituyóse la Mesa de Coordinación Intersectorial nel conceyu de Carreño, como una entidá complementaria al Conseyu de Salú Esistente y na que tán representaos tolos axentes sociales implicaos.
La mesa establecióse y establezse como un preséu o estructura pa ganar en salú por aciu una collaboración intersectorial, y concretar les acciones de la Estratexa. L'oxetu, yera y sigue siéndolo, avanzar en salú y equidad en toles polítiques, la contextualización, desenvolvimientu, coordinación, siguimientu y evaluación de la implementación de les intervenciones rellacionaes cola estratexa nel territoriu. Siendo la encargada de planiar, coordinar y garantizar la ellaboración del mapa de recursos comuñales.
Dende la so creación el Conceyu de Carreño tuvo realizando y collaborando nel desenvolvimientu d'actuaciones col fin de promocionar vezos saludables ente'l vecinderu. Non hai dulda que, anque les competencies sanitaries son de la comunidá autónoma, los Gobiernos Locales tienen una influencia directa na salú de la población, por aciu les sos polítiques de promoción de la salú, educación, bienestar social, tresporte, mediu ambiente, urbanismu, deportes, etc. Delles polítiques nun son na so totalidá competencia local, sicasí los sos servicios desenvuélvense nel ámbitu local, polo que la so coordinación col territoriu produz sinerxes bien efectives pa ganar en salú.
Ente les acciones que se vinieron desenvolviendo hai que destacar la identificación d'un mapa de los recursos comuñales disponibles p'ameyorar la salú y la calidá de vida de les persones en Carreño que tuvo de resultes la ellaboración de la Guía pa la Salú; talleres y charres d'avieyamientu activu; actividaes físiques y de salú como les rutes de “Caleyando Carreño”; el diseñu y publicación de dos guíes coles mires de dar a conocer los recursos disponibles: “Guía de Parques Saludables” del Conceyu y la Guía de Rutes Saludables de Carreño”, esta postrera va salir a la lluz a primeros de noviembre.
Albandi
