Mohamed Lamin Malyud, gobernador de la "wilaya" d'El Aaiún y representante de la República Árabe Saharagüi Democrática (RASD), at'opase n'Asturies pa contactar colos conceyos y entidaes hermanaes col Sáhara.

Na tarde désti miércoles, 2 d'Ochobre, nel salón de Plenos del Conceyu de Carreño, cola presencia de Luis Alberto Suárez Montiel de l'Asociación Asturiana de Solidaridá col Pueblu Saharagüi, celebróse la recepción y alcuentru de trabayu col Gobernador del Aaiún y el Delegáu Saharagüi n'Asturies, Yahya Mohamed.

Carreño ta hermanáu cola daira de Guelta na Wilaya d'El Aaiún nos campamentos de refuxaos saharagüis. Amás, el nuesu Conceyu collabora estrechamente cola asociación Amigos del Pueblu Saharagüi en diversos proyectos solidarios como “Vacaciones en paz”, onde neños y neñes saharagüis vienen al nuesu conceyu pa pasar dos meses de vacaciones acoyíos por families carreñenses.

Dende la fecha del hermanamientu fueron diverses les visites realizaes a los campamentos de refuxaos saharagüis en Tinduf d'Arxelia y diversos los proyectos financiaos de cooperación al desenvolvimientu, por numberar dalgunos:

Ayudes d'emerxencia p'alimentación. Dotación d'equipamientos básicos, Equipamientu vehículu y sofitu al tresporte públicu. Ayuda al centru de diversidá funcional de la Wilaya del Aaiún.  Amás del material escolar donáu pelos centros escolares del Conceyu, púnxose a puntu el vehículu que realiza'l tresporte escolar de les neñes y neños al centru. Mercáronse ruedes, revisión de frenos, aceite,...  l'asociación carreñenese “ Con el Sáhara Siempre” ye la encargada de sufragar la compra de combustible del vehículu pal añu escolar. Execución de les obres realizaes nos talleres del Centru de Diversidá Funcional  coles mires d'ameyorar la mala traza de los techos y los resquiebros de les parés fortaleciendo la estructura de la edificación; Dotóse al dispensariu d'enfermería con aparatos de diagnósticu simple como tensimetru, termómetros dixitales, mididor d'hemoglobina,…les faltes son munches y una d'elles ye en salú.

L'Asociación Asturiana de Solidaridá col Pueblu Saharagüi ye una entidá ensin ánimu d'arriquecimientu que promueve y realiza acciones, proyectos y programes de cooperación y ayuda solidaria cola República Árabe Saharagüi Democrática. Tamién busca la promoción de la mutua conocencia ente les sociedaes d'España y la República Árabe Saharagüi Democrática y procura l'espardimientu de la causa saharagüi ente la opinión pública.

“Dende fai yá munchos años esiste ente'l Conceyu de Carreño y l'Asociación Asturiana de Solidaridá col Pueblu Saharagüi una estrecha relación de collaboración, unu de los principales proyectos nos que collaboramos ye'l  programa “Vacaciones en Paz" – añedió la rexidora.

Anguaño tamién, l'Asociación Asturiana de Solidaridá col Pueblu Saharagüi allega a la convocatoria de subvenciones que'l Conceyu de Carreño vien convocando añalmente de “subvenciones a les actividaes de cooperación al desenvolvimientu que realicen les organizaciones non gubernamentales “. Presentó un proyectu denomináu “Sofitu al tresporte nos campamentos de población abelugada saharagüi” que va dexar la unviada de distintos recambios y repuestos de los vehículos 4x4 qu'integren el parque públicu de la RASD y qu'empresten servicios a los campamentos de población abelugada de Tindouf, n'Arxelia, qu'una vegada recibíos pola Media Lluna Colorada Saharui, van ser apurríos al Ministeriu de Tresporte de la RASD col fin de facilitar les funciones qu'ésti desempeña nos campamentos. Nestos campamentos les principales dificultaes nel tresporte vienen daes poles elevaes temperatures que tienen que soportar los vehículos y les insuficiencias que presenten les carreteres. Nesti contestu hai qu'evaluar el nivel tan altu d'averíes que se produz nel parque móvil y la situación d'escasez tanto de pieces de recambiu pal so arreglu o nel so casu la posible sustitución de la flota. Esti proyectu enmárcase nun programa más ampliu de sofitu sosteníu al pueblu Saharagüi que dende va años vien executando l'asociación que toma l'ayuda alimentaria, la dotación d'infraestructures y equipamientos, educación o la sensibilización n'Asturies. Col oxetivu fundamental de Contribuyir a la meyora de les condiciones de vida de la población saharagüi que vive nos campamentos de población abelugada 

“La concesiónnde la subvención según la so importe, tanto d'ésta como del restu de ONGD qu'alleguen a la convocatoria de subvenciones municipales, ta valorándose técnicamente. Una vegada emítase la valoración de los proyectu alzaráse la propuesta de resolvimientu de la concesión d'ayuda ya importe de la mesma p'aldericar na próxima Comisión Informativa de Facienda”– prosiguió Fernández.

“Los llazos col Sáhara estrecháronse entá ye más, nestos últimos años, col surdimientu d'una asociación local que preside Beatriz Salomón y que desenvuelve la programación d'acciones ciudadanes nel marcu del hermanamientu con Guelta. Llueu van entamar otra nueva edición del Mercadín Solidariu pa recaldar fondos que-yos dexen siguir executando proyectos y acciones solidaries. Confiamos que van tener muncho ésitu. Carreño caltien firme'l so compromisu col Sáhara teníu bien presente esta zona d'África en materia de cooperación al desenvolvimientu. Y estimamos al Gobernador y al Delegáu la so visita porque nos dexa caltener el feed back y coordinación tan necesarios pa una bona cooperación” – concluyó l'Alcaldesa.

El gobernador y el Delegáu roblaron nel llibru d'honor del Conceyu de Carreño.