Cuando apenes queden 15 díes pal estrenu absolutu teatral de la nueva producción de la directora y actriz candasina Verónica Gutiérrez nel Teatru Prendes “El Monstruo Revoltijo”, les persones usuaries del Centru de Sofitu a la Integración (CAI) de Candás, dependiente de la Fundación Fasad, yá tuvieron la oportunidá d'esfrutar con esti nuevu espectáculu. L'actriz convidólos a participar nel ensayu xeneral de la obra.

La cita tuvo llugar esti Vienres 25 d'ochobre a les 15:30 hores nel Salón d'Actos del Centru Polivalente “La Baragaña” de Candás.

Un ensayu xeneral, que se produz dellos díes antes de la presentación oficial, que tien por oxetu testar l'espectáculu reparando la reacción del públicu y correxir, si ye necesariu, dalguna parte de la obra.

Sol títulu “El Monstruo Revoltijo” la compañía “É Vero Teatro” con dirección y producción de la mesma Verónica Gutiérrez; movimientu escénicu Ana Pérez de Amézaga coles candasines Raquel Prendes y Gutiérrez presenta un espectáculu que parte d'una premisa: ¿quies conocer el fondu oceánicu?.

Pa ello un pexe abisal, un tanto inusual va amosanos les maravíes del mar. Pero daqué amenacia'l so fantásticu mundu. Polo que cola ayuda de dos sardines, una andarica y un montón de personaxes risonderos que se va dir atopando pel mundu, va lluchar contra una especie de revoltixu multicolor qu'anubre los mares: el plásticu. ¿Van Consiguir Vencelo?.

La resultancia, yá la conocen les persones usuaries del Centru de Sofitu a la Integración de Candás, el restu del públicu vamos tener qu'esperar al so estrenu, previstu pal domingu, 10 de Noviembre nel Teatru Prendes.

É Vero Teatru, ye una compañía de teatru asturiana fundada por Verónica Gutiérrez, que busca volver conectar col públicu, faciendo un tipu de teatru col que los mesmos actores y actrices esfrutaríen como espectadores. Anguaño tienen dos espectáculos en xira: ‘Catacróquen‘ y ‘Esa Oscura Concejala’. Como complementu a los sos espectáculos en cartel, tamién entamen espectáculos a la carta, música en directu y presentación d'eventos.