Los consistorios caltuvieron una xunta de trabayu pa empecipiar una serie d'actividaes culturales redolada a la figura d'Armando Palacio Valdés. Esa doble conexón ente Palacio Valdés y Candás, per un sitiu les sos llargues estancies veraniegues y, por otru, la relación esistente ente Candás y Rodillero, ye lo que motivó la collaboración ente los dos Conceyos (Carreño-Llaviana) pa encetar, ente otres actividaes, la reedición de la novela. Prevese incorporar a esti grupu de cooperación cultural ente conceyos a los conceyos d'Avilés y Cuideiru.

«Si dalgún día venís a la provincia d'Asturies nun vaigáis ensin echar una güeyada a Rodillero. Ye'l pueblu más singular y estrañu d'ella, yá que non el más formosu...» cuando falten apenes unos díes pa rematar l'añu 2019, esti testu volverá protagonizar l'axenda cultura del añu 2020, 135 años dempués de ver la lluz per primer vegada. Corría'l mes de febreru de 1885 cuando nes estanteríes de les llibreríes apaez la novela “José” del asturianu Armando Palacio Valdés. Una primer edición que foi editada por cuenta del escritor na madrilana imprenta de Manuel Ginés Hernández nun volume de 269 páxines. Y que a día de güei, unu d'esos exemplares, ta na Biblioteca Municipal “Carlos González Posada” de Candás gracies a la donación del vecín Francisco Javier Méndez Valdés.

“José” ye una novela emblemática pal conceyu de Carreño. Y ye por esti motivu que'l consistoriu carreñense, en collaboración col de Llaviana (conceyu natal de Palacio Valdés), cuando se cumplen 135 años de la so publicación, valoren reeditar conjuntamente anguaño, una nueva edición de “la novela de costumes marítimes” por antonomasia de la lliteratura asturiana y española.

En “José“, Armando Palacio Valdés recrea la vida cotidiana de los habitantes d'un pueblu marineru asturianu en 1885. Desenvolviéndose nel pueblu ficticiu de Rodillero, un pueblu definíu pol autor como «nun ye xentil, pero ye sublime, lo cual importa más».

Ye una novela realista, protagonizada polos homes y les muyeres que la so vida centróse na mar como lo amuesa esti párrafu de la novela: «Los homes salen a la mar pela mañana o a medianueche, según la estación, y tornen pela tarde: les muyeres ocupiénse en llevar el pexe a les villes inmediates, o en tostalo pa escabeche nes fábriques, en texer y arromendar les redes, coser les veles y nos demás queferes domésticos». Una novela que nos recuerda aquel Candás de les fábriques de conserva, de les salazones, de la llucha constante de los nuesos güelos y güeles pa sacar alantre a les sos families naquella etapa tan dura.

Una novela que foi aceptada gratamente pola crítica y el públicu de la dómina. Ente toles obres de Palacio Valdés ye la que más vegaes se tradució, publicóse en 1900 en llingua inglesa. Amás en 1925 foi llevada al cine so la dirección de Manuel Noriega.

Armando Palacio Valdés nació'l 4 d'ochobre de 1853 en Entrialgo, Llaviana. Educóse n'Avilés hasta 1865, en que se tresllada a Uviéu a vivir col so güelu pa estudiar el bachilleratu. Nesa ciudá ye onde conoz y forxa una especial amistá con Leopoldo Alas Clarín y Tomás Tuero. En llogrando'l so títulu de bachiller n'Artes en 1870, decidió siguir la carrera de Lleis en Madrid, que concluyó en 1874. En 1885 naz el so primer fíu al empar que fina la so primer esposa y publica la novela “José”. Foi miembru de la Real Academia de la Lengua y en dos causes tuvo a puntu de consiguir el Nobel de Lliteratura. A la de encuadralo dientro d'una corriente lliteraria, Palacio Valdés, amuésase bien cercanu a la Xeneración del 98 nel so ataque contra l'atrasu y l'inxusticia social de la España de principios del sieglu XX.

Ye un gran ceador de tipos femeninos y ye diestru na pintura costumbrista como lo demuestra en “José“, al igual que sabe tamién tratar personaxes secundarios. Al contrariu que otros autores concede al humor un papel importante na so obra. La so obra foi bien traducida, especialmente al inglés, ya igualmente apreciada fora d'España.

Les primeres esquises de José tuvo d'igualos Palacio Valdés en redol al branu de 1883, en Candás, onde folgaba y alternaba en conxustes y casinos, pero onde, coles mesmes, paez ser que s'interesa pel mundu marineru, participa nes xeres pesqueres, toma notes y apella a los pescadores por que-y faciliten toa suerte de detalles, anécdotes y noticies sobre la so actividá… según palabres de José Luis Campal en “José. La novela marinera d'Armando Palacio Valdés”.

Nesti primer alcuentru celebráu en Candás, na casa consistorial, participaron Francisco Trinidá, espertu en palaciu Valdés y Llaviana, la vicealcaldesa de Llaviana, Inés García y l'Alcaldesa de Carreño, Amelia Fernández. Peracabóse la collaboración pa reditar nel primer semestre d'anguaño la novela “José”, según un abanicu de posibles collaboraciones ente los conceyos venceyaos a la figura del escritor, qu'inclúin la implicación de los centros educativos y el retomar la representación teatral y musical empecipiada va años en Candás.