La parroquia de Tamón ye l'escenariu escoyíu por qu'esti fin de selmana “Pachu y Marcelino ¡Vaiga par de divinos!” faigan pasar al vecinderu un tarde cargada de llárimes de risa y risaes na segunda función de la “XV edición de la Ronda de Teatru per Carreño”.
“Un programa cultural entamáu y financiáu pola Conceyalía de Cultura del Conceyu de Carreño que'l so oxetivu foi y sigue siendo dende la so primer edición llevar arte y cultura a la zona rural. Creando nuevos espacios d'ociu y entretenimientu, culturales, al empar qu'espacios nos que la ciudadanía interactúe ente ella. Una llínea de trabayu, una forma d'entender la sociedá na que unu/a nun tien por qué movese de la so redolada p'asistir a una función teatral, sinón que ye l'actividá la que se mueve a la so redolada, hasta los Centros d'Iniciativa Rural” rellató Juanjo Fernández-Conceyal de Cultura.
“Charres, conciertos, cursos, esposiciones,… son dalgunes de les acciones que nesi enfotu por averar la cultura a tolos rincones del Conceyu venimos desenvolviendo conxuntamente col vecinderu. Una confluencia de sinerxes, positives, ente la ciudadanía y los Grupos de Teatru, nesti casu, nel que se pon de relieve la importancia y el valor d'estos alcuentros culturales como una forma de dinamización de la parroquia, nos que non yá ta implicáu l'alministración local, sinón les distintes asociaciones vecinales del Conceyu”prosiguió'l Conceyal.
El públicu asistente va poder esfrutar de dos actuaciones bien distintes, per un sitiu so la dirección de Rosa Ana Muñoz el Grupu de Teatru Xana de Perlora va representar la obra “Pachu y Marcelino ¡Vaiga par de divinos!” con autoría de la mesma directora. Una obra risible, surrealista y políticamente incorrecta. Los nuesos protagonistes, Pachu y Marcelino, viven na ciudá, dedicándose a defender los sos derechos y los de los demás. Un bon día, el so fíu torna al llar pa comunica-yos que quier casase con una moza d'una familia tradicional, tresmanando, ensin dulda, la vida de la so familia.
El GT “Xana” ye unu de los grupos de teatru con más solera d'Asturies y de xacíu el más antiguu del conceyu. Naz en redol a 1980. Siendo la primer compañía, xuntu col GT Horru de Barcia, la Compañía Asturiana de Comedies y GT de Tapia de Casariego que participen nel I Salón de Teatru Costumista Asturianu de Candás nel mes d'abril de 1991.
Fueron premiaos en numberosos llugares d'España, actuando non yá en territoriu nacional, si non tamién llueñe de les nueses fronteres, como por casu Xinebra, Berna, Basilea. Nel añu 2000 reciben el urogallu de bronce, galardón qu'otorga'l Centru Asturianu de Madrid. Ente que nel 2001 VIII Premio Distinción. Asina mesmu fueron ganadores de dellos premios aurora, los postreros bien recién, na edición de 2017, meyor dirección de la mano de Rosana Muñoz y meyor maquillaxe y vestuariu. O n'años anteriores el de meyor actriz per parte de Covadonga Braña o'l de meyor llume y decoráu.
Pero primero va ser la vez de la prodixosa voz de Alba Bravo Fernández, acompañada a la gaita por Antonio Medina “Toño”.
Alba ye una adolescente del conceyu de Gozón, una promesa del Cantar Asturianu, perteneciente a l'Asociación Cultural del Cantar Asturianu Narcea, que so la mano de José Antonio González “Cantu la vara” ensaya toles selmanes nel Colexu Poeta Antón de Marirreguera. Participó nos certames y festivales que se celebren por toa Asturies na categoría de tonada xuvenil, voz femenina. Collechando grandes ovaciones y aplausos. Siendo finalista de la última edición, la XXVII, del Concursu y Amuesa de Folclore “Ciudá d'Uviéu”, na so modalidá.
La función d'esta “XV Ronda de Teatru per Carreño”va tener llugar esti sábadu 19 de xineru a les 19:00 hores d'en les instalaciones del Chigre de la Casa d'Acoyida de la Familia Ferroviaria de Tamón. La entrada va ser llibre y gratuita, hasta completar aforu disponible.
Albandi
