El Conceyu de Carreño efectúa unes obres de meyora nel Sondéu del Bombéu allugáu en Villar, na parroquia de Quimarán.
El Consistoriu garantiza'l suministru d'agua en tol Conceyu, tanto a núcleos de población compactos como esvalixaos, n'igualdá de condiciones. Tola xestión y caltenimientu de les instalaciones y del serviciu depende del Departamentu d'Obres y Servicios, a esceición del caltenimientu y llectura de contadores.
La captación y suministru d'agua en Carreño provien de dos víes: la suministrada por CADASA, que supon aprosimao un 45% de l'agua introducida na rede, frente los recursos propios, esto ye, la procedente de recursos hidrográficos del Conceyu. Esta postrera ye captada en superficie, en manantiales, y/o captada en fondura, en sondeos.
Les obres de meyora van llevase a cabu na instalación eléctrica nel sondéu de Villar. La instalación eléctrica d'esta infraestructura municipal taba xenerando continues averíes que taben provocando constantes paraes del bombéu, lo que llevaba a tener suministrar, en delles ocasiones, agua de CADASA a les viviendes que davezu son suministraes por esti bombéu.
“Dende los Servicios Municipales analizóse la situación, llegando a la conclusión que la solución más facedera yera y sigue siendo'l cambéu del cuadru eléctricu. Polo que se va dase na instalación y montaxe d'un cuadru eléctricu arrancador pal control de la bomba de sondéu monofásica de 1.5CV. La execución de la obra va correr al cargu de Electricidad Amieva, S.L.” - señaló Manuel Noceda, edil de Mediu Rural.
El Sondéu de Villar de Quimarán deposita la so agua nel Depósitu Regulador de Peña Tocente, abasteciendo a les viviendes del barriu de Villar. Amás, abastez al Depósitu de Muniello dando serviciu ésti a los distintos barrios de Prevera.
Albandi
