L'Asociación Vecinal Santiago de Albandi, que preside Miguel
Ángel Fernández, celebró un añu más, esti 14 de mayu, l'homenaxe
a socios y socies de más edá de la entidá, actu nel que tuvo
presente l'Alcaldesa de Carreño, Amelia Fernández.
Les celebraciones consistieron en:
–Misa a les 13 h. oficiada pol párrocu Jesús García y cantada
pol Coru de Perlora, que dirixen Alba García y José Luis Iglesias.
–Comida d'hermandá nun establecimientu de Perlora y sortéu de
regalos ente asistentes.
Trés persones fueron homenaxaes anguaño:
- Víctor Manuel Junquera Prendes, de 86 años, de casa Miguel.
Trabayador del ferrocarril del Carreño mientres 6 años para depués
empezar a trabayar nes bateríes de coque en Ensidesa, onde se
xubiló. Ye aficionáu a la poesía y asiduo de les xornaes
lliteraries Mar Adentro de Candás. Anguaño mora en Candás, casáu,
con fíu, que ye bomberu en Xixón y una fía, que mora en Francia, y
tien dos nietos.
- Manuel Amandi García, 84 años, de casa Cuervo. Maríu de la
popular «Muyer de la Paxa» Remedios Gallegos. Empezó a trabayar a
los 9 años de «criao», nun pudo dir a la escuela. Tres esta etapa
empezó a trabayar de peón nel antiguu Orfelinato mineru de Xixón,
güei Universidá Llaboral. Trabayó na mina nel pozu Molinucu en La
Felguera del grupu Lláscares. Tuvo 35 años na Xunta del puertu.
Anguaño mora en Xove. Ta casáu, con un fíu, una biznieta, Candela,
y otra en camín.
- Emilia González Vega, 84 años de Casa La Pozala. Llabradora
xubilada. Anguaño vive en La Calzada cola so fía. Tuvo dos fíos,
unu d'ellos fináu fai 7 años, tien 3 nietes, un nietu y dos
biznietes.
Albandi
