El Conceyu de Carreño, al traviés de la Conceyalía de Cultura, collabora, un añu más, nel Homenaxe que se fai a los Homes y Muyeres que trabayaron nes antigües fábriques de conserva y salazón.

La iniciativa parte de l'asociación ensin ánimu d'arriquecimientu “Candás Marinero” y empieza nel añu 2014. Esa primer edición foi dedicada a la villa vecina de Lluanco,  y sucesivamente pasaron a engrosar esta llista d'homenaxes Puerto Vega, nel 2015, y Llastres l'añu pasáu. 

Nesta cuarta edición van ser los Homes y Muyeres de L.luarca los  que van ser homenaxaos el sábadu 20 de mayu en Candás.   

“Ye muncho más lo que xune a dos conceyos como Valdés y Carreño, a dos villes como L.luarca y Candás, que lo que los dixebra.  Dos conceyos con puertos pesqueros, que siempres tuvieron la mirada puesta nesi mar, nel nuesu mar Cantábricu,  escontra la industria de la conserva. Ensin escaecer tampoco a l'agricultura y la ganadería, sectores tamién bien complicaos ya infravaloraos.  Dos pueblos que mientres los homes, mayoritariamente, trabayaben na mar, les muyeres ayudaben a la economía familiar faciendo lo propio nes fábriques de conserva y salazón. Con esti actu  pretende rindise homenaxe a aquelles persones que llucharon pol porvenir de les sos families, los sos pueblos. Un homenaxe por que les xeneraciones vinientes sepan que gracies a ellos y elles güei somos lo que somos y podemos esfrutar d'una serie de derechos, llibertaes, privilexos impensables naquella dómina” señaló Cecilia Tascón- Edil de Cultura-.

La xornada va empezar a les 17 hores con un pasacais, dende'l Parque Les Conserveres hasta'l Paseín, al cargu de la Banda de Gaites de Candás. Pa de siguío proceder al descubrimientu d'una placa d'azulexu conmemorativa, de l'artista local Rita Prendes, na Antigua Fábrica d'Ortiz. 

A  les 18 hores na Ilesia Parroquial de San Félix de Candás celebrárase una misa en memoria de trabayadores de dambes villes. La celebración va ser oficiada pol párrocu local José Manuel García Rodriguez. Ente que la parte musical va correr a cargu del Coru “Villa Blanca” de L.luarca, so la dirección de David Colado, director tamién de la Escuela Municipal de Música “Miguel Barrosa“ de Candás.

Los actos van rematar con un Conciertu nel Teatru Prendes a les 20hores. Cola actuación del cantautor candasín Pipo Prendes ; el Coru “Villa Blanca”  de L.luarca y el “Coro de la Bodega” de Candás , so la dirección de Salvador Cuervo.

En palabres del escritor candasín José Marcelino García “Remembrando'l pasáu, les feríes de l'alma, los díes alloñaos de mar y trabayu, L.luarca y Candás xúnense como dos pueblos que yá fueron, y agora pa siempres van ser, hermanos nel combate pola vida. Veles, barcos, arena, espluma, llucha y sollozos. Esa foi la verdá de los nuesos dos pueblos mientres sieglos”.