El miércoles, 28 de xunu a les 19:30 h., va tener llugar nel Centru d'Escultura de Candás, Muséu Antón la inauguración de la esposición “El arte enlatado: la publicidad en las conservas de pescado en Asturias (1911-1937)”, cola que conmemórase l'octoxésimu aniversariu del fallecimientu del escultor candasín Antonio Rodríguez García “Antón”.

L'amuesa ta constituyida por un ampliu repertoriu d'estampes publicitaries producíes mientres el primer terciu del sieglu XX para promocionar los productos ellaboraos poles empreses conserveres asturianes.

“La esposición compleméntase con una selección d'obres d'Antón fiel reflexu de la influencia qu'exercieron estos anuncios comerciales nel nuesu artista local y cola proyección de la única película publicitaria que se conoz d'una fábrica de conserves de pexe n'Asturies, realizada a mediaos de los años venti nes instalaciones de Pesquerías Asturianas, S.A., de Lluanco” – señaló l'Alcaldesa y Presidenta del Patronatu, Amelia Fernández.

Con esta esposición pretende ufiertase un capítulu destacao y poco conocíu de la hestoria industrial y artístico d'Asturies nel períodu que toma dende la segunda década del sieglu pasáu hasta la Guerra Civil.

La esposición, va poder ser visitada nel Centru d'Escultura de Candás, Muséu Antón hasta'l 17 de setiembre. L'horariu de visites ye de martes a domingos 12 a 14 y de 18 a 21 hores. La entrada ye gratuita.

“Estimamos encarecidamente a toles persones ya instituciones que col préstamu de les obres, fixeron posible la realización d'esta amuesa” – concluyó l'Alcaldesa.