El programa “ACTÍVATE, Desemplegaos/es de Llarga Duración” va
dexar al Conceyu de Carreño dar los primeros pasos d'esti nuevu
equipamientu cultural.
L'Ayuntamientu de Carreño va poner en marcha'l próximu 1 d'Abril el
proyectu “Factoría Musical de Carrió”, que va dar na
contratación mientres 6 meses de diez persones paraes de llarga
duración.
Les persones destinataries d'esti programa de formación y empléu
(financiáu pol Serviciu Públicu d'Empléu del Principáu d'Asturies
con una subvención inicial de 95.451,40 €) son persones mayores de
25 años, inscrites nel Serviciu Públicu d'Empléu y en situación
de desempléu de llarga duración.
L'oxetivu d'esti proyectu ye qu'estes persones adquieran una
formación acreditada nel Certificáu de Profesionalidá de nivel 1
“Operaciones auxiliares d'acabaos ríxidos y urbanización”,
que-yos cualifique nel oficiu y déxe-yos adquirir habilidaes pal so
insertamientu llaboral. Pa ello, estos 10 trabayadores van tener la
dirección d'un monitor docente de la especialidá formativa, y un
mentor encargáu de la so orientación ya insertamientu llaboral.
La selección de les persones participantes va realizase teniendo en
cuenta'l siguiente orde de prioridá:
1º. Participantes nel Programa d'Activación pal Empléu del Estáu
mayores de cuarenta y cinco años.
2º. Participantes nel Programa d'Activación pal Empléu del Estáu
menores de cuarenta y cinco años.
3º. Desemplegaos/es de llarga duración, mayores de 45 años.
4º. Desemplegaos/es de llarga duración mayores de 25 años y
menores de 45.
La xera práctica que van realizar va suponer la primer actuación
sobro les instalaciones del Centru d'Iniciativa Rural de Carrió, de
cara al so futuru usu como “Factoría Musical de Carrió”. Nesti
sentíu, el personal contratáu va dar en picar les cares de morteru
del esterior del edificiu, el llevantamientu de la cera esistente y
allugamientu de nueves ceres, aplicación d'un morteru termoaislante,
y eliminación de barreres arquitectóniques nel so accesu.
Albandi
