El Principáu va invertir 1,6 millones nel arreglu de la carretera CE-1 ente Candás y Zanzabornín amás Infraestructures destina anguaño 353.115 euros al dragáu y caltenimientu de caláu del puertu pesqueru. El vicepresidente del Gobiernu, Juan Cofiño, axuntóse esti 5 de marzu cola Alcaldesa de Carreño, Amelia Fernández.
La Conseyería d'Infraestructures, Mediu Ambiente y Cambéu Climáticu va invertir 1.667.158 euros ente 2020 y 2021 nel arreglu de la carretera CE-1, que xune Candás y Zanzabornín, nel conceyu de Carreño. El vicepresidente del Gobiernu y responsable d'esti departamentu, Juan Cofiño, visitó Candás xuntu cola directora xeneral d'Infraestructures, Esther Díaz.
El conseyeru esplicó que'l proyectu d'acondicionamientu de la carretera, yá redactáu y en fase de llicitación, tien un plazu d'execución de siete meses. La obra va executase en dos añalidaes y destináronse 300.000 euros p'anguaño y 1.367.158 pa 2021.
Les actuaciones previstes consisten na meyora del firme de la calzada entre Candás y la so conexón cola carretera GO-4, nel enanche del tramu ente la villa y l'apeaderu de Regueral, y na reposición y meyora de la señalización horizontal y vertical.
Nel tramu urbanu que va dende'l puntu kilométricu 0 hasta'l 0,684, va reforzase'l firme. A partir d'ende hasta'l puntu kilométricu 2,542 va ampliase l'anchu de sección cola construcción de dos carriles de 2,5 metros d'anchor, un arcén pela marxe esquierda de dos metros, y va ameyorase el firme, el drenaxe y van reasitiase les marquesines.
Nel siguiente tramu, ente los puntos kilométricos 2,542 y 7,116, va ampliase tamién l'anchu de sección nes zones disponibles con sobreanchu y va acometese la meyora del drenaxe.
Cofiño avanzó más que la so conseyería va reparar anguaño los fundimientos de la plataforma de la carretera AS-19 ente L'Empalme y Avilés, asitiaos nos puntos kilométricos 6,350 y 7. El costu d'estos dos proyectos, a puntu de llicitase, xube a 226.477 euros. Nel primeru de los fundimientos, va construyise un muriu d'escollera con cuatro metros d'altor mediu y30 de llargor, ente que nel otru va executase un muriu de formigón de dos metros, encimentáu sobre micropilotes de 12 metros.
Amás, Infraestructures va reparar tamién nesti exerciciu otros dos fundimientos de la plataforma na carretera de La Formiga (CE-8), con un costu de 96.405 euros, que'l so proyectu ta en redacción. La obra nel puntu kilométricu 0,250 va consistir na construcción d'una escollera de trés metros d'altor y 15 de llargor, ente que en kilómetru 0,800, nel mirador de La Formiga, va executase un muriu de formigón de 20 metros con cimentación especial. El plazu d'execución, una vegada axudicáu'l proyectu, va ser de trés meses.
Per otra parte, el vicepresidente sorrayó que la conseyería va invertir 353.115 euros nel dragáu y caltenimientu de calaos nel puertu pesqueru de Candás, obra que va tener un plazu d'execución de trés meses. Esta actuación de dragáu va consistir na estracción de 3.410 metros cúbicos de la dársena interior y na canal d'accesu y d'otros 2.238 metros cuadraos de la dársena esterior. Los sedimentos d'esta última dársena van estrayese por medios terrestres pa, darréu, treslladalos a Cogersa.
Albandi
