Nesta edición 2018 el mercao sal
d'escena con una animación distinta que trasgrede el Parque de Les
Conserveres pa invadir les cais candasines. Un pasacais inaugural que
va partir del Teatru Prendes y va percorrer delles cais de la villa
con música, gües y carru del país. Visites empuestes por Candás
na redolada de la ruta clarianiana Snob son dalgunos de los
alicientes.
En Les Conserveres va abrir mañana,
vienres 29 de xunu, les sos puertes el tradicional mercao a les 17
hores. La cita nesti eventu comercial – turísticu va allongase
hasta'l domingu 1 de xunetu, cuando a partir de les 21 hores va
cerrar les sos puertes hasta l'añu que vien.
“Un añu más repitimos con un
mercao clariniano que nunca pasa de moda, anguaño vamos tener 45
puestos de los cualos 12 van ser de gastronomía y 33 d'artesanía,
amás d'una barraca que va ser xestionada pol Club de Rugby de Candás
per segundu añu consecutivu. Como marca la tradición a lo llargo de
los trés díes vamos esfrutar con distintes actuaciones musicales
con trés agrupaciones del conceyu: la Banda Gaites Candás, el grupu
de Baille “La Folixa” de Carreño'l grupu de Baille “San Félix”
de Candas. Amás el públicu infantil va poder esfrutar de talleres
d'artesanía amás d'una xornada de xuegos tradicionales asturianos,
onde van poder realizar carreres de panoyes y llecheres ente otres
munches coses” – esplicó la conceyala de turismu Paula
Cuervo.
Anguaño como novedá'l Mercao va
empecipiar a partir de les 18 hores con un pasacalles y ambientación
musical que va ser acompañáu polos personaxes clarinianos. Una
pareya de gües, tirando d'un carru del país y empuestos por Luisito
ganaderu de Pillarno conceyu de Castrillón, van abrir el desfile. La
Banda Gaites de Candás, cola dirección de Velu Muñiz, va cerrar.
“Pa esti pasacais inaugural,
animamos a tol vecinderu de la villa y restu del conceyu que
s'empreste a acompañanos vistiendo la indumentaria marinera o
tradicional asturiana. Vamos Empezar a partir de les 18 hores dende'l
Teatru Prendes de Candás y vamos pasar por distintes cais de la
villa. Llamentamos nun poderdisponer pa dichu desfile de nengún de
los dos grupos de baille del conceyu. Contactamos cola dirección de
dambos pero nun teníen disponibilidad pa participar. Asina que
podremos esfrutalos n'otros momentos del mercao. Con esta
ambientación más allá del escenariu habitual del mercao
pretendemos animar a la xente a visitalo y por otru, dar respuesta a
la demanda d'hostelería y de bona parte del vecinderu que nos
pide que diversifiquemos los espacios nos que programamos actividaes
pa dar dinamismu a tolos rincones de la villa. De la Avda. del
Ferrocarril, vamos dir a la cai Pedro Braña, Escultor Antón, Avda.
Reina María Cristina, Glez. Muniello, Pardies, Avda Constitución,
Pedro Herrero, la céntrica Baulio Busto y vamos volver al
parque de Les Conserveres. A ver si gusta la iniciativa y en próximes
ediciones va consolidando. ” – comentó la edil.
Otra de les novedaes nesta edición del
mercao nel 2018 son les visites empuestes por distintos llugares de
la ruta clariniana “Snob” que percuerre un total de siete puntos
a lo llargo de la villa marinera de Candás. Esta ruta “Snob”,
basada nel cuentu satíricu del insigne escritor español “Clarín”
recoyíu nel so llibru “Cuentos morales” (1896). El cuentu trata
sobre'l personaxe de Rosario Alzueta, una braniante de finales del
sieglu XIX de la localidá marinera de “Palmera” (trasunto
lliterariu de Candás), que la so falta de cultura, vanidá y
pretensiones de grandor satiriza l'escritor, como exemplu de les
nueves clases arriquecíes. van percorrer coles visites empuestes los
llugares de Candás que pudieron sirvir d'inspiración a “Clarín”
pa escribir el so relatu, y dexa ilustrar cómo yera aquel Candás de
finales del sieglu XIX, en rápidu tresformamientu, nel que los
pescadores empiecen a convivir colos obreros de les fábriques de
conserves, y colos primeres turistes y braniantes. El percorríu de
la visita son unos 850 metros y unos 25 minutos averaos de duración.
Estes visites van realizase con personaxes clarinianos acompañaos de
música de gaita.
“Pensamos que ye importante crear
una conexón ente la ruta clariniana esistente na villa cola actividá
del Mercao y dar a conocer la obra l'insigne escritor, por ello la
compañía Nun – Tris va encargase al traviés de personaxes
como Doña Berta, Onofre y el mesmu Clarín a llevar a visitantes
por dalgunos de los llugares polos cualos trescurre la ruta”
– prosiguió Paula Cuervo.
Les visites van ser trés: el sábadu
30 de xunu a les 12:30 hores y a les 19 hores. Y el Domingu 1 de
xunetu a les 12:30 hores. Toes elles van salir dende'l puntu
d'información turística allugáu nel Mercao Clariniano.
PROGRAMA MERCAO CLARINIANO 2018
–Mientres los trés díes de
mercao, amuesa d'animales: emus, exemplares de pita pinta, oques,
poni… Animales propiedá del carreñense Emilio Martínez
Martínez.
–Animación con personaxes
clarinianos (Clarín, Onofre, Doña Berta, l'Indianu y el Pregoneru
(Compañía de Teatru Nun-Tris)
–Concursu de pintura: van poder
solicitar información y/o consultar les bases na zona habilitada pa
los talleres infantiles, tamién puede traese el dibuxu de casa y
apurrilo na mesma zona. El plazu remata'l domingu a les 14 hores.
Vienres, 29 de xunu
–17:00 hores. APERTURA DEL
MERCAO y bienvenida a artesanos/as participantes.
–18:00 hores. Pasacais y ambientación
musical con personaxes clarinianos. Va Empecipiar el desfile una
pareya de Gües y Carru del País. Cierra'l mesmu la Banda Gaites
Candás.
Nota: rogamos a tol vecinderu de la
villa y restu del conceyu que, con vestimienta marinera, acompañen
el desfile inaugural.
–19:30 hores. PERCORRÍU
INSTITUCIONAL pol parque cola Banda Gaites Candás.
Sábadu, 30 de xunu
–12:00 hores. Taller infantil “Crea'l
to animal con cueru” al cargu de Ventolín Artesanía
(inscripciones nel puntu d'información turística)
–12:30 hores. Visita empuesta polos
distintos llugares de la ruta clariniana “Snob” colos personaxes
clarinianos. (salida dende'l puntu d'información turística)
–13:00 hores. Actuación del GRUPU DE
BAILLE TRADICIONAL “San Félix” de Candás.
–18:30 hores. Ambientación musical
al cargu de la bandina “La Curuxa”
–19:00 hores. Visita empuesta polos
distintos llugares de la ruta clariniana “snob” colos personaxes
clarinianos. (salida dende'l puntu d'información turística)
–20:00 hores. Xuegos tradicionales a
cargu del Club de deporte Rural “Monte Areo” de Quimarán:
carreres de panoyas, tiru al palu, carrera de lecheres, la xaronca,
tiru cuerda…
Talleres en vivu:
María José Fernández González –
Taller de Cobertor (a partir de les 16 hores)
Asociación Aula de Persones adultes de
Candás – Taller d'Encaxe de #Boliyu
José María Lobo Manrique – Taller
de Fragua
Rosario Pérez – Taller
d'ellaboración de marañueles (de 13 a 14 hores)
Domingu, 1 de xunetu
–12:30 hores. Visita empuesta polos
distintos llugares de la ruta clariniana “Snob” colos personaxes
clarinianos. (salida dende'l puntu d'información turística)
–13:00 hores. Animación musical al
cargu de un TRIO DE GAITES de la Banda Gaites Candás.
–De 17:30 a 19:00 hores. Taller
infantil, Vetusta: La mio pequeña maqueta al cargu de El Llar
Animación (inscripciones nel puntu d'información turística)
–19:00 hores. Entrega de premios del
concursu de pintura
–20 hores. Actuación del grupu de
baille “La Folixa” de Carreño.
Talleres en vivu:
Asociación Aula de Persones adultes de
Candás – Taller d'Encaxe de Boliyu
José María Lobo Manrique – Taller
de Fragua
Rosario Pérez – Taller
d'ellaboración de marañueles (de 19 a 20 hores)