Esti pasáu xueves 8 d'agostu, a les 12
hores nel salón de Plenos del Conceyu de Carreño cola presencia
del delegáu saharagüi p'Asturies, Yahya Edjil, recibióse Baka
Saleh Mahmud, Tanyah Mulay -Ahmed Sidi-Brahim, Mohamed-Moulud Bachir
Mohamed-Moulud Jadad Ahmed Jalil qu'esfruten el periodu branizu con
families d'acoyida carreñenses (en Candás y Perlora), según a trés
neños acoyíos en Gozón, Topa, Lamnan y Lamnan.
L'Asociación Asturiana de Solidaridá
col Pueblu Saharagüi ye una entidá ensin ánimu d'arriquecimientu
que promueve y realiza acciones, proyectos y programes de cooperación
y ayuda solidaria cola República Árabe Saharagüi Democrática.
Tamién busca la promoción de la mutua conocencia ente les sociedaes
d'España y la República Árabe Saharagüi Democrática y procura
l'espardimientu de la causa saharagüi ente la opinión pública.
“Dende fai yá munchos años
esiste ente'l Conceyu de Carreño y l'Asociación Asturiana de
Solidaridá col Pueblu Saharagüi una estrecha relación de
collaboración, unu de los principales proyectos nos que collaboramos
ye el programa “Vacaciones en Paz”. Esti programa consiste na
acoyida d'un neñu o neña saharagüi d'edá ente los 7 y 12 años,
la parte de la población más vulnerable, mientres dos meses de Xunu
a finales d'Agostu per parte de families del conceyu que pueden ser o
bien pareyes o persones soles” – esplicó l'Alcaldesa.
“El Conceyu de Carreño financió'l
treslláu a Asturies, y el so correspondiente viaxe de vuelta, a
aquellos menores saharagüis que fueron acoyíos por families
carreñenses, dientro del Programa "Vacaciones en Paz".
Como tolos años, a pidimientu de l'Asociación, entamóse una
recepción oficial pa dar la bienvenida a los neños y les neñes
saharagüis y amosar el sofitu a les families d'acoyida y al
programa. Los menores pasen la temporada braniza nel conceyu, lo
que-yos supon un descansu a tolos niveles de la situación que tienen
nel so país d'orixe y apúrre-yos un chequeo médicu del so estáu
de salú” – añedió la rexidora.
Anguaño tamién, l'Asociación
Asturiana de Solidaridá col Pueblu Saharagüi allega a la
convocatoria de subvenciones que'l Conceyu de Carreño vien
convocando añalmente de “subvenciones a les actividaes de
cooperación al desenvolvimientu que realicen les organizaciones non
gubernamentales “. Presentó un proyectu denomináu “Unviada de
materiales de construcción con destín a los campamentos de
población abelugada saharagüi” que va dar na unviada de material
de construcción a los campamentos de población abelugada de
Tindouf, n'Arxelia, qu'una vegada recibíos pola Media Lluna Colorada
Saharui, van ser apurríos al Ministeriu de la Construcción de la
RASD col fin de facilitar les funciones qu'ésti desempeña tocantes
a la construcción y rehabilitación d'infraestructures y
equipamientos qu'empresten servicios a la totalidá de la población
que vive abelugada nos campamentos. Trátase d'un proyectu que va
sirvir pa fortalecer el papel de Ministeriu de la Construcción,
según al Gobiernu de la RASD, pos-yos va sofitar logísticamente nel
exerciciu de les sos funciones, al apurri-yos materiales básicos de
construcción. Los campamentos de población abelugada dependen, pol
so peculiar situación, nun altu grau de l'ayuda y cooperación del
esterior. Por ello, el suministru de los citaos materiales
constitúyese como un actu básicu pa llograr la supervivencia nos
campamentos. Los materiales van ser adquiríos y unviaos a los
campamentos na caravana que l'Asociación Asturiana de Solidaridá
col Pueblu Saharagüi. L'oxetivu fundamental qu'escuerre esti
proyectu ye'l de Contribuyir a la meyora de les condiciones de vida
de la población saharagüi que vive nos campamentos de población
abelugada.
“La concesión de la subvención
según la so importe, tanto d'ésta como del restu de ONGD
qu'alleguen a la convocatoria de subvenciones municipales, ta
valorándose técnicamente. Una vegada emítase la valoración de los
proyectu alzaráse la propuesta de resolvimientu de la concesión
d'ayuda ya importe de la mesma p'aldericar na próxima Comisión
Informativa de Facienda” – concluyó Fernández.