Ángel Martínez, de 51 años y vecín
de Candás xugó una partida d'axedrez cola ex campeona del mundu nes
partíes simultánees que xugó la ucraniana, na tarde d'esti 17 de
setiembre, nel Palaciu de Congresos de la sede Ferial Luis Adaro de
Xixón.
Muzychuk ganó'l Campeonatu Mundial
Femenín d'Axedrez Rápidu (2016) y el Campeonatu Mundial Femenín
d'Axedrez Blitz en dos ocasiones (2014 y 2016). Ye activista
pola igualdá de la muyer nel deporte y n'avientu de 2017 negóse a
participar nel Campeonatu del Mundu d'Axedrez Rápidu y Relámpago
en Riad (Arabia Saudita) porque nun quería tar “onde a
les muyeres trátase-yos como ciudadanes de segunda”.
Ángel Martínez y Ana Muzychuk
xugaron simultáneamente mientres una hora. La fía de Martínez
siguió-yos la partida dende Belfast, ciudá na que mora anguaño.
Fíxolo por streeming. Ángel tien diversidá funcional
derivada d'un accidente de tráficu que tuvo en 2008. Cuándo él y
la so muyer, Cruz Posse, veníen de ver competir a la so fía la
karateka, Sheila Martínez Posse. De magar, el so procesu de
recuperación foi trabayosu y lentu. Gracies a el so tesón y al
emburrie de la so familia foi pasu ente pasu restableciéndose.
P'ameyorar la so movilidá y capacidaes cognitives, animáu pola so
muyer, apuntóse a les clases d'Axedrez qu'imparte, nel centru
polivalente “La Baragaña“, el Club Axedrez Candás. Carlos
García ye'l so docente dende va dos años. Col axedrez Martínez
perfecciona les capacidaes pa resolver problemes, y desenvuelve les
habilidaes llectores, de llinguaxe, matemátiques y memorístiques.
Nel marcu de la collaboración
municipal cola Sociedá Internacional de Bioética SIBI, que dirixe'l
doctor candasín Marcelo Palacios, el calquier del conceyu fíxose
notar nel X Congresu Mundial de Bioética: Mocedá y protección del
mediu ambiente.
El Club Axedrez Candás sumóse a les
partíes simultánees cola axedrecista unviando tamién a mozos del
conceyu. El club de Candás, que cunta con escuela deportiva
adscrita al Patronatu municipal, fomenta'l xuegu-ciencia ente la
infancia y mocedá local llogrando un equilibriu nel
aprendizaxe y na evolución propia d'avanzar nel xuegu mesmu, que-yos
va dexar una mayor capacidá d'astracción, planificación ya
integración d'idees (relación ente pieces, estratexes) flexibilidá
cognitiva y capacidá de deducción (lo que'l contrariu puede llegar
a mover, y antemanase a l'acción).
Esta tarde, Samuel José García, vecín
d'El Valle de Carreño, ya Izán Rodríguez, vecín de Candás,
dambos de 16 años punxeron en práctica la estimulación
intelectual que supon la práctica del Axedrez. Izán quedó segundu
na multi partida. Dambos xugadores participaron, en
representación del Club Axedrez Candás, nel Campeonatu d'España
Sub 18 celebráu en Benidorm.
Asina mesmu, mientres el congresu
habilitóse un puntu d'información turística del conceyu y una
degustación de postres típicos de Candás. Concretamente marañueles
feches de forma artesanal n'un obrador local como se contempla na
marca de garantía “ Alimento del Paraíso” y xelaos tamién de
fabricación propia de los Helio Hermanos.
Anna Muzychuk fixo una curtia
intervención na inauguración del Congresu sobre la importancia del
Axedrez y el deporte como midíes saludables, y n'unu de los momentos
en que nun competía robló-y el so tableru al vecín de Candás con
diversidá funcional. Trátase d'un tableru bien especial que-y
regaló la so fía Sheila. como alcordanza d'Irlanda onde lo traxo.