Porque ye dómina de recuperar una de les nueses tradiciones más antigües nes que una comunidá axúntase pa compartir lo que la naturaleza da y tresmitir d'una forma oral la so cultura, les sos tradiciones y asina non escaecer los sos raigaños.
Nesta celebración participó tol alumnáu del centru. Col propósitu de recuperar esa tradición, de les llabores que nestos meses fáese nel campu, y aprender un pocu más sobre la cultura asturiana. A tal fin y p'arreyar, aún más, a los neños y neñes, ambientóse el Centru decorando les instalaciones. Y tou l'alumnáu dexó de llau'l so uniforme p'asistir güei al Colexu vistíos de sardineres o con ropa de Mahón, a cencielles con un vaqueru ensin que faltara'l pañuelu de cuadros azules. La xornada tuvo llugar güei vienres 9 de noviembre, a lo llargo del horariu lectivu.
Fueron delles les actividaes nes que l'alumnáu pudo esfrutar y aprender sobre les tradiciones asturianes. Fueron 14 talleres nos que participó tol alumnáu del centru, amás de les dos escueles rurales esistentes nel Conceyu, la de LLorgozana y El Valle que'l so alumnáu güei treslladose a les instalaciones del Poeta Antón de Marirreguera pa esfrutar de la xornada.
Taller de boliyos, de cerámica, d'ellaboración de marañueles, tortos, sidra duce, miel, xuegos tradicionales, cuentacuentos, pandereta y tambores,… na impartición d'estos talleres non yá participó la comunidá educativa del centru si non asociaciones o entidaes venceyaes al Conceyu, como la de Sidra Casera, fueron les encargaes del bon desenvolvimientu de les mesmes.
D'esta forma'l taller de boliyos les encargaes del so desenvolvimientu fueron les encaxeres pertenecientes a l'Aula d'Adultos; la ceramista local Rita Prindes foi la encargada de la realización de la cerámica; la panadería la Flor de Marañueles; Félix de “Casa Luis” de Perlora instaló nos baxos del colexu un improvisáu llagar; los deportes tradicionales correspondió-y al equipu de deporte autóctono “Monte Areo” y por casu l'asociación Reciella foi la encargada del cuentacuentos.
P'acabar el día la comunidá educativa, tres la finalización del horariu lectivu, alumnáu, profesoráu y padres y madres esfrutaron d'una xornada de convivencia na que tastiaron les castañes asaes y la sidra duce.
Albandi
