Les Escueles de Llogorzana acoyeron na tarde d'ayeri la inauguración del programa cultural “XIV Ronda Teatral” per Carreño, entamada pola Conceyalía de Cultura. Nuna sala atarraquitada de públicu tuvo llugar la primera de les diez funciones teatrales que dende avientu a mayu, van poder esfrutase nes distintes parroquies del Conceyu.
Diez tardes de teatru, nes que, como asocedió güei, les rises, lloros, amoríos, alcuentros, desalcuentros, reconciliaciones,… de los personaxes de les obres entemecíos colos sentimientos del públicu asistente, y van percorrer tolos rincones del nuesu territoriu.
Al actu allegó en representación del Conceyu'l Conceyal de Deporte Roberto Bueno, y vecín de la parroquia. El cual actuó como maestru de ceremonies. Bueno dexó constancia que “estes representaciones teatrales nacen del alcuerdu de collaboración ente'l Conceyu de Carreño y trés asociaciones asturianes: Federación de Grupos de Teatru Amateur d'Asturies, FETEAS; l'Asociación d'Interpretes del Cantar Asturianu, AICA; y l'Asociación Cultural del Cantar Asturianu Narcea. Y tamién de la collaboración del Ayuntamientu y les entidaes teatrales del Conceyu, el Grupu de Teatru Xana” de Perlora y “Les Ayalgues” de Carreño.
Nesta primer sesión actuó El Grupu de Teatru “*Carbayín” de la parroquia de *Carbayín - Siero. Pero primeru José Manuel González “Cantu la vara”, acompañáu de Juanín de la Torre “Noreña” a la guitarra allantó al públicu asistente cola so voz interpretando delles temes del Cantar Asturianu.
El Grupu de Teatru “*Carbayín” cola dirección de J.R. Oliva, Premiu Aurora a la Meyor Dirección nel pasáu Salón de Teatru Costumista de Candás, representó una obra que'l so autor ye'l mesmu Oliva, “Tu, yo y el vecín” na qu'un matrimoniu quier dixebrara pero un vecín, un poco “gabiteru” intenta mediar ente la pareya intentando recordar cómo llegaron a esa situación.
En 1979 l'actual grupu de teatru recueye'l testigu de la formación teatral que yá esistía na so parroquia. Esta nueva iniciativa ye tomada pel Centru Cultural “Nuestra Señora de Covadonga”. A esta llamada respuenden componentes del antiguu grupu como nuevos actores y actrices. Como estrenu d'esta nueva andadura punxeron n'escena la zarzuela asturiana "La Sosiega”. Col tiempu creen un grupu de neños y neñes que xunto coles nueves incorporaciones conviértese na nueva cantera de la formación. Na actualidá aquellos neños y neñes nel añu 1991 recueyen el testigu y convirtiéronse nos actores y actrices anguaño de la Compañía.
Punxeron n'escena obres de los clásicos del Teatru Costumista Asturianu como Pachín de Melás, Eladio Verde, Pin de Pría,… pero nos postreros 20 años les obres que representaron fueron escrites, espresamente pa ser puestes n'escena pol Grupu, pol so director el dramaturgu asturianu José Ramón Oliva.
El “Cantu la vara”, anque nació n'Uviéu, pasó casi tola so vida en Riosa. Tres una pequeña estancia en Torrevieja, tres la so xubilación, anguaño mora en Candás. Llugar nel que nel 2012 crea una escuela del Cantar Asturianu.
La primer vegada que se xube a un escenariu foi nel so Conceyu, en 1976 nun festival que se celebraba pola festividá del Rosario, nel que cantaben los grandes del Cantar Asturianu. A partir d'esa actuación empecipia la so trayectoria como cantante del Cantar Asturianu de más de cuarenta años, na que collechó grandes ésitos.
La siguiente tarde de teatru va ser el sábadu 19 de xineru nel “Chigre” de la parroquia de Tamón. Esi día va xubir al escenariu'l Grupu de Teatru “El Hórreo” de Barcia-Valdés cola obra “Superpepín” tamién de José Ramón Oliva. Obra cola que consiguieron faese col ciñu del públicu qu'allega al Salón de Teatru Costumista, llevándose'l Premiu Aurora qu'otorga'l públicu. Amás de cuntar colos monólogos d'Armando Felgueroso “Min de les Pieces” Premiu Aurora al meyor Actor Secundariu nel 2018.
Les sesiones son toes a les 19:00 hores, gratuites hasta completar aforu.
Albandi
