Dolce parroquies y dolce esposiciones individuales con un llazu d'unión n'una amuesa final na Antigua Fábrica d'Ortiz en Candás. Esa yera la premisa cola que l'Asociación Cultural “Candás Marinero” entamó nel iviernu del 2015-2016 el proyectu “Carreño y sus Gentes”. Una gran esposición fotográfica monográfica de les xentes del Conceyu de Carreño. Y que na tarde d'esti sábadu 12 de xineru foi inaugurada na Antigua Fábrica d'Ortiz.
Al actu, al qu'allegó un numberosu públicu y nel que tuvieron representaes la totalidá de les Asociaciones Vecinales del Conceyu, collaboradores del proyectu, tuvo presentáu pola catedrática d'hestoria y cronista oficial d'Avilés Pepa Sainz. Tres la cual intervinieron Pedrete Aramendi, Presidente de l'Asociación “Candás Marinero” organizadora de la esposición y l'Alcaldesa de Carreño Amelia Fernández.
L'actu remató con una visita, por parte de la representación municipal y entidaes vecinales, a les distintes estancies qu'ocupa la esposición na que'l Presidente de l'Asociación foi esplicando la hestoria de les distintes fotografíes, persones qu'apaecen, añu de la mesma, anécdotes,...Pero antes d'esta visita institucional, les persones asistentes a la inauguración pudieron esfrutar de l'actuación, so la dirección de Salvador Cuervo, del “Coro de la Bodega”. El cual d'una forma maxistral empunxo a l'agrupación poles habaneres y cantares marineros que s'entonaben nes antigües “bodegues candasines”, faciendo creer al públicu asistente que s'atopaba n'una d'aquelles.
“Carreño y sus Gentes” nun ye solo una esposición de semeyes del pasáu sieglu, sinón que ye un homenaxe a toes aquelles persones, families que formen parte del pasáu, presente y futuru del Conceyu. L'Asociación Cultural “Candás Marinero” dientro del alcuerdu de collaboración col Conceyu de Carreño, foi arrexuntando instantánees, de los vecinos y vecines, por toes les parroquies del Conceyu, llevando a cabu un trabayosu procesu de digitalización y arquivu de les fotografíes antigües vencíes pol vecinderu. Nesti trabayu llegaron axuntar más de 4.500 instantánees de la nuesa hestoria.
Ye un proyectu qu'ensin la participación de la ciudadanía non podría habese lleváu a cabu. Más de 150 families, persones o entidaes sociales son les que d'una forma desinteresada participaron, punxeron el so granín d'arena nesti proyectu, collaborando na cesión de les imaxes. Persones que vieron la importancia d'esta idea de salvaguardar la nuesa idiosincrasia, de sumar y faer que les xeneraciones futures siéntanse arguyoses de la unión de les dolce parroquies, del trabayu que toles persones implicaes realizaron.
Pero “Candás Marinero” nun ye namá una persona, ye un equipu que la so cabeza visible ye Tito Aramedi, pero detrás d'él tán o tuvieron Jose Antonio González, Saturno Prendes, Javier Méndez y Herminio Aparicio. Ellos son les persones les que con gran percuru dixitalizaron les instantánees por que perduren nel tiempu, por que toos y toes esfrutemos d'elles. Instantánees qu'en dellos casos taben nos bagules nel desván y que fixeron, qu'a día de güei, salgan a la lluz y que pasen a formar parte del arquivu históricu del Conceyu, de la memoria de toos nós. Una forma de nun perder los nuesos raigaños, y de nun escaecer a los nuesos antepasaos.
De les más de 4.500 instantánees, en total recoyíes, pol equipu empobináu pore Aramendi nesta esposición d'Ortiz podrá esfrutase d'una selección de 720 fotografíes impreses en cartón pluma, distribuyíes en 180 paneles nes que se repasa la hestoria de cada parroquia, de les sos xentes nel sieglu XX. Onde caúna de les 150 families que collaboraron cola aportación de les sos alcordances familiares atópense representaes.
Nes 720 fotografíes que pueden almirase na Antigua Fábrica d'Ortiz repasase la hestoria de Carreño, de les sos xentes nel sieglu XX. Vamos Poder ver xuntos familiares, neños y neñes na escuela, comuniones, bodes, fiestes, y como non momentos nos que queda reflexáu los queferes propios de la vida na zona rural. Y lo qu'entá ye más importante, gracies a esta iniciativa púdose identificar a les persones qu'apaecen nelles o dar conocer momentos de la vida de los nuesos padres, güelos, bisagüelos que nun conocíamos.
Caúna de les parroquies ta representada na amuesa al traviés d'una selección de 60 imaxes. A la de la selección d'estes atendióse a una serie de criterios como ye que toles families qu'apurrieren material atópense representaes na amuesa; escoyéronse les que disponíen d'un meyor resolvimientu y qu'amás fueren les más representatives de la so zona; les más antigües y que nelles apaecieren más d'una persona.
Atendiendo a estos criterios la fotografía más antigua que s'espón na amuesa ye de 1900 y correspuende a la parroquia d'El Pieloro na que vemos a una muyer de la familia de Marina García Álvarez nuna semeya d'estudiu posando de pies al pie de una siella cola vestimenta típica de la dómina. Si atendemos al restu de parroquies:
• Albandi, fotografía de 1947 perteneciente a la familia de José Antonio Lazcano.
• Ambás, fotografía de 1929 perteneciente a la familia de Casa Sierra.
• Candás, fotografía de 1910 perteneciente a la familia de Casa Balsinde d'el Regueral.
• Carrió, fotografía de 1924 perteneciente a la familia de José Luis Hevia.
• Quimarán- El Valle, fotografía de 1916 perteneciente a la familia de Casa Victor San Pablo.
• LLorgozana, fotografía de 1941 perteneciente a la familia de Casa Vitoriano de Coyanca.
• Perlora, fotografía de 1917 perteneciente a la familia de Pilar Busto Arrinda.
• Prevera, fotografía de 1944 perteneciente a la familia de Casa Genaro.
• Priendes, fotografía de 1925 perteneciente a Casa José Evaristo.
• Tamón, fotografía de 1925 perteneciente a Inés García.
Asina por casu la imaxe más antigua de Candás recueye'l posáu en 1910 del matrimoniu formáu por Genaro García García y Casimira Balsinde acompañaos de los sos trés fíos. Nella podemos reparar a una familia de la dómina afatiada cola ropa de los domingos, na que los padres apaecen sentaos y los dos fíos varones a los llaos ente que la fía detrás de los sos proxenitores, y na que los trés fíos tienen les sos manos sobre los costazos de los sos padres.
Ente que la de la parroquia de Perlora, de 1917, amuesa una imaxe cotidiana de la selmana como yera l'asistencia a la catequesis, nes que les güeles faen una instantánea coles neñes baxa la sollerte mirada del director de la mesma, Manuel Alonso Pintado.
Otres de les instantánees de Candás tien detrás una de les anécdotes que remarquen la importancia d'esti tipu de trabayos y que fixeron salir a la lluz hestories, que d'otra forma les xeneraciones futures nun podríen conocer. Nesti casu ye una imaxe de trabayadores de l'antigua Mina d'El Regural nos años 50. Estos trabayadores fueron les persones que-y mercaron la so primer bicicleta al gran ciclista profesional Vicente López Carril “el candasu”. Dase la circunstancia que'l padre de López Carril foi trabayador de la mina y los sos compañeros nun actu de compañerismu fáen-y esti regalu al so fíu.
La esposición de “Carreño y Les sos Xentes” ta na Antigua Fábrica d'Ortiz hasta'l próximu sábadu 10 de febreru nel siguiente horariu:
• De Martes a Vienres de 18 a 20 hores
• Sábados y Domingos de 12 a 13 hores y de 18 a 20 hores.
Albandi
