El próximu 1 d'Abril ta prevista la puesta en marcha del Taller d'Empléu “Carreño a punto”, que promueve el Conceyu de Carreño cola cofinanciación del Serviciu Públicu d'Empléu del Principáu d'Asturies (SEPEPA).

Esti proyectu d'Empléu Formación, pa que'l so funcionamientu van contratase mientres un añu a 30 trabayadores en desempléu (15 operarios/es de llimpieza viaria, y otros 15 d'albañilería), tien como oxetivu ameyorar la ocupabiliá d'estes persones, facilitándo-yos una formación profesional fayadiza (que va ser oxetu de reconocencia oficial, por mediu del Certificáu de Profesionalidá correspondiente) simultánea a la so actividá llaboral.

El Taller d'Empléu “Carreño a punto” va acometer una serie d'actuaciones pa la meyora d'equipamientos n'espacios públicos en tol conceyu de Carreño: instalación de parques biosaludables nel Pobláu de Albandi y en Perán, parque pa mascotes en Candás, etc. Tamién se va encargar de la debida llimpieza y decoro de los espacios públicos del conceyu,: llimpieza viaria de Candás, de parques y xardinos del conceyu.

Los trabayadores a contratar tendrán de cumplir los siguientes requisitos: tener 25 años o más, ser paraos/es de llarga duración, nun ser perceptores de prestación o subsidiu de desempléu, y nun tener el Certificáu de Profesionalidá de la mesma especialidá. Nun van ser colectivu prioritariu quien participaren con anterioridá n'otros programes d'empléu – formación. La selección de trabayadores va realizase al traviés d'ufierta xenérica d'empléu (xestionada pol Serviciu Públicu d'Empléu), polo que les persones comenenciues tendrán d'actualizar la so demanda na Oficina del SEPEPA.