El próximu 23 de febreru les tables del Teatru Prendes van volver a cimblar col soníu melódicu de les Habaneres y del Cantar Marineru nel III Certame Infantil y Xuvenil de la modalidá que se celebra en Candás.  Cuatro coros procedentes de Málaga, Madrid, Llión y Asturies van ser los encargaos de convertir al coliséu candasín nuna fábrica de conserva y salazón, onde yera habitual oyer esti tipu de cantares.

Los  cuatro coros van tener qu'interpretar cada unu cuatro obres, de les que dos van ser de llibre elección, otra del repertoriu internacional o de la so rexón d'orixe, empezando pola tema obligáu, l'habanera “ENTRE CANDÁS Y CUBA” con lletra y música d'Aurelio Martínez/Miguel Aráez, que   tendrá de ser interpretada “a cappella”. Obra inédita que va ser estrenada nesti III Certame.

L'habanera ye un xéneru musical aniciáu en Cuba na primer metá del sieglu XIX. Nel so orixe yera fundamentalmente un cantar románticu d'amores y desamores, anque la guerra d'Independencia de finales del sieglu XIX  dio-y un calter patrióticu, reivindicativu, los marinos que dende la tabierna cantaben llenos de añoranza pela tierra cubana y de munchos amores dexaos ellí.

“Col III Certame Xuvenil d'Habaneres damos continuidá a al trabayu empecipiáu por José Ramón González Muñiz nel 2012 col Certame de Cantares de la Bodega.  Pretendemos siguir recuperando, calteniendo y promocionando toos aquellos cantares populares qu'en dalgún momentu cantábense mientres el trabayu nes fábriques de conserva y salazón. Y ye por ello que'l Premiu Especial del Públicu lleva'l nome de José Ramón” señaló Cecilia Tascón- Conceyala de Cultura-.

“Los cuatro coros que van participar nesta edición son el coru “Encanto” de Madrid; el coru Xuvenil “Ángel Barja” de Llión;  la "Escolanía del Orfeón Universitariu” de Málaga; y Coru “Iuvena” d'Asturies. Nesta nueva edición va participar per primer vegada un coru d'Asturies. Ampliándose'l númberu de participantes, yá que por cuenta de la calidá de los coros fíxose bien difícil faer una primer selección. Por cuenta de esti fechu la organización decidió que'l númberu de coros participantes nesta edición sía de cuatro finalmente” comentó la edil.

·Coru Encanto de Madrid. So la dirección de Mariano García Sánchez.  Ye la sección infantil y xuvenil de la Familia Coral Santiago Apóstol. Ta formáu por 50 neños y neñes de más de 30 localidaes de Madrid y Toledo. Grabaron 4 discos. Alzáronse col tercer premiu nel I Certame Infantil y Xuvenil d'Habaneres y Cantar Marineru de Candás nel añu 2016.

·Coru Xuvenil Ángel Barja de Llión. So la dirección d'Elena Fernández Delgado y Aitor Olivar García. Ta formáu por 50 persones, con edaes entendíes ente los 12 y 18 años. Nel I Certame Infantil y Xuvenil d'Habaneres y Cantar Marineru de Candás celebráu nel 2016 llevóse'l segundu premiu.

·Escolanía del Orfeón Universitariu de Málaga. So la dirección Mario Porras Estrada. Ta formáu por 35 persones ente los 7 y 13  años. Ye un coru relativamente nuevu pos creóse nel añu 2013, anque'l so coru matriz, l'Orfeón Universitariu de Málaga ye fundáu en 1975.

·Coru Iuvena d'Asturies. So la dirección de José Manuel González Valdés. Ta formáu por 24  moces de distintos llugares d'Asturies. Pertenez al Conservatorio del Occidente d'Asturies. Amás de la so mocedá, pos ye fundáu nel 2013, una de les particularidaes d'esti coru ye la sólida formación musical de los sos miembros, lo cual déxa-y incluyir diversos instrumentos nes sos actuaciones