La Fundación Municipal de Cultura, Educación y Universidá Popular, dependiente del Conceyu de Xixón, cursó pidimientu de cesión temporal al ente carreñense pa incorporar la obra d'Antón “Fin de la Romería” a la so amuesa. Uuna amuesa que, so la dirección de Manuel Cabriffosse Cuesta (comisionáu) va tratar sobre la sidra.
L'amuesa que se va inaugurar nel mes de marzu nel Centru de Cultura Antiguu Institutu de Xixón, va cuntar coles dos de les obres “Fin de Romería”
“Fin de la Romería”, 1929. Acuarela sobro papel. Ésta obra ye una copia d'un dibuxu del pintor asturianu Evaristo Valle y na que s'inspiraría años más tarde pa la escultura.
“Fin de la Romería”, 1932. Escultura en bronce a partir del modelu orixinal n'escayola que se caltien nel Muséu.
La escultura Fin de la Romería reflexa aspeutos folclóricos de la so tierra. Destaca pola facilidá con que l'artista resuelve la composición calteniendo l'equilibriu al compensar el cuerpu de tamboriteru, de mayor pesu visual, l'enclín del gaiteru. Introduciendo esta pieza na producción d'Antón esa nota risondera y socarrona consustancial a la identidá asturiana allegre y festiva.
La escultura Fin de la Romería reflexa aspeutos folclóricos de la so tierra. Destaca pola facilidá con que l'artista resuelve la composición calteniendo l'equilibriu al compensar el cuerpu de tamboriteru, de mayor pesu visual, l'enclín del gaiteru. Introduciendo esta pieza na producción d'Antón esa nota risondera y socarrona consustancial a la identidá asturiana allegre y festiva.
Antonio Rodríguez García, “Antón”, nació en Candás el 16 de febreru de 1911 nel senu d'una familia humilde. Yá de neñu amosó una almirable disposición y maña pa tolo rellacionao col dibuxu y les manualidades. En 1924, terminaos los estudios primarios, ayuda al so padre nos llabores d'albañilería. D'esti
períodu de niñez y adolescencia caltiénense numberosos dibuxos, pintures, relieves y escultures. Cola intercesión del pintor Evaristo Valle consigue'l respaldu económicu del industrial conserveru Alfonso Albo, lo que-y dexa treslladase a Madrid, pa empecipiar la so formación artística asistiendo como alumnu llibre na Escuela Cimera de Belles Artes de San Fernando y a les clases de dibuxu del Círculu de Belles Artes. Amás collabora como ayudante nel taller del escultor Juan Cristóbal. Los branos, que los pasa en Candás, dedícase a realizar escultures siendo los modelos persones del so pueblu, sobremanera neñes y les muyeres de la so familia.
Nos empiezos de los años trenta empieza a participar en certames, salones, concursos d'arte nacional. Por casu na esposición Nacional de Belles Artes con una cabeza de bronce o nel XII Salón de Seronda de Madrid cola talla de madera “La mio Güela”.
Nel branu de 1936 sospriénde-y la guerra civil en Candás, onde ye deteníu y encarceláu na Ilesia Parroquial, salvando de la destrucción el so pervalible retablu churrigueresco. Treslládase-y darréu a Murias de Candamo, confinándosele nun campu de trabayu, onde muerre na primavera de 1937.
Dende'l puntu de vista de la técnica puede afirmase qu'Antón ye un escultor d'oficiu, qu'apodera a la perfección numberoses técniques, dende la talla al modeláu, un apreciable pintor y un notable dibuxante. Estilísticamente pue señalase una constante nel so faer, como ye'l d'espresar la so fonda esmolición por reflexar la realidá social, la idiosincrasia, les costumes y los tipos del so pueblu asturianu
El Centru Escultóricu que lleva'l so nome recueye una amuesa permanente de la so obra. Axunta una selección de pieces escultóriques realizaes ente 1928 y 1936 y tomando prácticamente la totalidá de les temes, les técniques que tomó. Al pie de pieces emblemátiques y fuertemente espresionistes como “La mio Güela” o “La Señá Isabel”, o iróniques y escrutadores de la peculiaridá asturiana como “Rapacina”, “Fin de la romería” o “Antroxu”, el visitante va poder atopar obres llenes de gracia, delicadeza ya intimidá, como les semeyes de “Oscarín” y “Maruxa”, al pie de otros tan firmes y tan bien resueltos técnicamente como'l del so mecena “Alfonso Albo” o'l so maestru “Evaristo Valle”.
Albandi
