Actu institucional 8-M 2019 en Candás

Esti xueves, 7 de Marzu a les 18 hores, Candás va acoyer nel Teatru Prendes l'Actu institucional del Gobiernu del Principáu nel que se va faer entrega de la Distinción Muyer del añu 2019.

Carreño va reconocer, un añu más, a les sos muyeres. Nun premia batalles, nin proezas heroiques, porque la épica atópase nel día ente día.

La celebración va empezar colos cantares de Maria Esther Vega, Muyer de Carreño 2018, y el grupu de danza prima y cancioneru candasín, esencia pública de lo que quier homenaxase.

“Un añu más celebramos el 8 de marzu como una xornada xusta qu'aboga por una sociedá más igualitaria pa toes y toos, una sociedá na que s'esaniciara la desigualdá de xéneru. Esa desigualdá que trai de resultes que les muyeres asuman, casi en solitariu, les responsabilidaes del cuidu; la que produz la fienda salarial, la qu'enllena los puestos de poder d'homes. La que trafica con neñes y muyeres con fines d'esplotación sexual, la que viende y merca el cuerpu y la dignidá de les muyeres” – espresó Amelia Fernández, Alcaldesa de Carreño.

“La igualdá tien de ser un fin y un mediu. Xornaes y actividaes como les previstes nos próximos díes en Carreño formen parte de la llucha pa consiguila, y cada pasu que se da nesa dirección fáese más posible, avérala y auméntala. Ye por ello, como diz el lema de la campaña institucional d'esti 2019, “Pola igualdá avanzamos”. Avanzamos escontra ella, pero tamién ameyoramos la calidá de la nuesa sociedá cuando vamos sumando victories” – prosiguió Fernández.

Pal Gobiernu del Principáu d'Asturies la igualdá ye una área prioritaria, tresversal en tola acción política. Ye por ello que'l Presidente del Principáu d'Asturies, Javier Fernández, siempre participó nesti actu, sofitando la necesidá de la llucha pola igualdá. Nesta ocasión nun va poder participar por motivos de salú, pero va cuntase cola presencia ya intervención del Conseyeru de la Presidencia y Participación Ciudadana, Guillermo Martínez, que dende l'añu 2012 dirixe la Conseyería onde s'enmarquen les polítiques d'igualdá.

Anguaño la temática que se va a visibilizar y trabayar en Carreño, por alcuerdu de les asociaciones de muyeres del conceyu, nel marcu del trabayu que se desenvuelve na Comisión  de Siguimientu del Plan d'Igualdá ye otru venceyu más – de los yá reconocíos - ente les muyeres y la mar. Ye imprescindible reconocer el trabayu del cuidu. El de tierra adientro, les muyeres de Carreño, como n'otros llugares (campu y mar) siempres fixeron más que tou eso. Llabores del mar, trabayu duru y poco remuneráu (o nada). Ayeri y güei. Les xeres de les muyeres nun son meros complementos, nin son consustanciales al fechu de ser muyer.

Y anguaño 2019 cueye'l testigu de María Esther, Dominica Fernández “Ica la Redera”, escoyida pola Comisión, como muyer del añu. Ica exerció un papel importante n'actividaes venceyaes al mar, concretamente como profesional que se dedicó a la confección, arreglu y caltenimientu d'artes y apareyos de pesca. Un oficiu de calter fundamentalmente manual y que rique d'una alta cualificación.

“El trabayu de redera cuenta con una llarga tradición desenvuelta dende'l sieglu pasáu, afaciéndose col pasu del tiempu a les distintes necesidaes de los barcos y a los diversos tipos d'artes  de pesca L'oficiu de redera  acostuma a tresmitise ente familiares y na actualidá nel so sector avieyáu, por falta de relevu xeneracional. Tradicionalmente veníen realizando los sos llabores nos puertos, n'el mesmu muelle, anque les  condiciones físiques de la redolada llaboral ameyoraren, inda ye un oficiu que precisa reconocencia, esperando qu'esta reconocencia atraiga a nueves xeneraciones a los oficios del mar pa caltener tanto arte, tradición y saber faer” – añedió la rexidora.

Amás d'Ica, la redera candasina, se visibilizará el llabor d'otres rederas asturianes de conceyos, colos que Candás, texió redes y realizó intercambios coles sos fábriques conserveres al traviés de los alcuentros añales qu'impulsa l'asociación cultural “ Candás Marineru”.
Concretamente va destacase a Mª Lluz Fernández Fernández de Puertu de Vega (Navia), María Luisa Margolles Folles, de Llastres (Colunga); Sonia Álvarez García de San Juan de La Arena (Sotu'l Barcu) y Aurelia Rodríguez Fernández de L.luarca (Valdés).
A toes elles va apurríse-yos un retruque de la pieza cerámica “La Redera” obra de la ceramista local, Rita Prendes.

Nel trescursu del actu, que van conducir Alain Fernández y Arancha Nieto, habrá una representación teatral “ Puntadas de mar” al cargu de la compañía de teatru profesional “ La Tejedora de Sueños”, llectura d'unos poemes obra del poeta José Marcelino García, y va cerrase el mesmu con una intervención de la Escuela de Música “Miguel Barrosa de Carreño” que va coordinar  la profesora Begoña Vázquez.