Dende la celebración del IV Congresu internacional de Serok designóse, tal día como güei, 8 d'abril como'l Día Internacional del Pueblu Xitanu. Les principales reivindicaciones d'esti colectivu yeren, y siguen siendo, ente otres, amenorgar la enorme fienda de desigualdá y l'esclusión, garantizar la educación, ameyorar la cualificación profesional pa favorecer l'accesu al mercáu llaboral o la erradicación del chabolismu y amenorgamientu de la infravivienda.
Nel Carreño güei, amás del Día Internacional del Pueblu Xitanu, celébrase la clausura definitiva del pobláu promocional allugáu en Piñeres ( Candás).
Nesti mes d'Abril el barriu Promocional de Piñeres - qu'allugaba los módulos de formigón que se construyeron de forma provisional pa sustituyir al chabolismu- tapióse definitivamente al tar les families reasitiaes en vivienda normalizada. El Principáu tapió, al traviés d'una empresa d'especializada contratada a tal fin, los últimos módulos del barriu. Primeramente rematárase el reasitio en pisos de titularidá pública de les families que los ocupaben.
Les dos últimes families qu'habitaben nel barriu promocional yá fueron reasitiaes en viviendes públiques de titularidá autonómica algamando, d'esta miente, l'oxetivu de erradicar esti barriu de infraviviendes. A tal fin, va dar en ellaborar el proyectu de baltadera per parte de VIPASA, y dende el consistoriu local va collaborase programando una primer llimpieza de la redolada y enseres qu'hai ellí atropaos pa dar na so retirada.
El conocíu Barriu Promocional de Piñeres asítiase sobre una finca de 2.500 m² de titularidá municipal. Nel añu 1978 estos terrenes fueron donaos pol Consistoriu al Estáu pa la construcción de Casa Cuartel de la Guardia Civil, tres nun cumplise esti fin, la propiedá, por reversión, volvió ser municipal. El 27 d'avientu de 1984, el Plenu Municipal alcordó destinar l'inmueble a la construcción de viviendes prefabricaes para erradicar el chabolismu nel Conceyu. Primeramente construyéronse en 1985, con calter provisional, non permanente y como pasu previu a la necesaria integración y reasitio con calter definitivu de la población ellí asitiada, seis módulos prefabricaos. Nel añu 2001, tres una quema, fueron baltaos y sustituyíos poles dolce viviendes prefabricaes de formigón anguaño esistentes nel asentamientu.
Dende la Conceyalía de Bienestar Social, traviés de los Servicios Sociales Municipales, trabayóse con esti colectivu en distintos programes educativos, sociales, o formativos, coles mires d'acabar coles sos desigualdaes. Programa de sofitu escolar y xeres d'ociu educativu; charres-talleres de too tipu: educación sexual, planificación familiar, primeros auxilios, curiaos y urxencies en casa, asma, preparación teórica del permisu de conducir; clases d'alfabetización; acompañamientu na busca de vivienda normalizada, ente otros, fueron dalgunos de los proyectos de los cualos les más de venti families qu'anguaño viven nel conceyu beneficiáronse. Programes que tuvieron unes consecuencies positives nesta comunidá y que se vio reflexaes más espresamente cuando VIPASA, procedió al zarru, por aciu el tapiáu, de los dos últimos módulos prefabricaos d'esti barriu candasín.
L'oxetivu del tapiáu qu'ordenó VIPASA ye qu'estes infraviviendas nun puedan volver ser ocupaes mientres l'ente autonómicu, propietariu de los mesmos, da na contratación de la baltadera definitiva. La policía local tamién va collaborar con vixilancies periódiques pela zona.
A principios d'anguaño, cuatro yeren les families qu'entá vivíen el barriu, tres la so reubicación en vivienda normalizada y el zarru d'estos dos módulos, ponse fin a trenta y tres años de chabolismu en Carreño.
Albandi
