El Colexu San Félix premiáu pola Sociedá Española de Cardioloxía

El centru escolar de Candás alzóse col Primer Premiu Mimokids, d'ámbitu nacional, galardón que concede la Sociedá Española de Cardioloxía, nesti casu pola obra de teatru “Aventura en La Boca del San Félix”.

Esti galardón ta dotáu con un diploma acreditativu, un cheque de 500 € para material escolar y un Desfibrilador.

Dende'l cursu 2015-2016 la Sociedá Española de Cardioloxía (SEC) entama y promueve el programa educativu Mimocardio col que pretende averar la prevención de la enfermedaes cardiovasculares a los más pequeños y pequeñes de la casa al traviés de la representación d'una obra de teatru. La orixinalidá d'esti proyectu mora nel que los neños y les neñes non yá pueden ver la obra de teatru, sinón que se-yos fai parte, siendo los actores y actrices. Calando, na so persona, d'una forma más intensa los mensaxes, y llevándolos a la práctica non yá nel colexu, sinón compartiéndolos tamién en casa coles sos families.

Esta cuarta edición del proyectu taba dedicáu a la relación ente la Salú Bucodental y la Salú Cardiovascular. Pa ello la SEC pal cursu 2018-2019 punxo en marcha la 2ª Patrulla de la Salú (ye según llamen a los y les protagonistes del proyectu) cola obra de teatru “Una Aventura Dental” nel que cada centru escolar puede modificar la representación según les sos preferencies pa da-y un toque d'orixinalidá, faela so, siempres que nun s'alterie'l mensaxe esencial.

Con “una Aventura Dental” la SEC quier dar a conocer la relación esistente ente la salú dental y cardiovascular. Son numberosos los estudios que señalen la relación ente la periodontitis y l'enfermedá cardiovascular, polo que ye fundamental concenciar a la población infantil de la importancia de ciudá la salú bucodental y allegar al dentista pa curiar la salú xeneral. Con esta obra de teatru l'alumnáu d'educación infantil y primaria del Colexu San Félix afayó, por casu, que si les melles tán sanes, amenórgase'l riesgu de carecer una enfermedá cardiovascular.

La obra cola que'l Colexu San Félix presentóse y ganó, lleva por títulu «Aventura en La Boca del San Félix». Ye una adaptación de la obra orixinal, realizada pol profesoráu coles mires d'averase a la realidá del centru y faer más compresible el mensaxe. Nella participó, tamién l'alumnáu de los cuatros grupos de 1º y 2º, y les sos families. Siendo estrenada y presentada a tola comunidá educativa nel Festival de Navidá, celebráu nel Teatru Prendes de Candás.

La ceremonia d'entrega del galardón tuvo llugar na Casa del Corazón en Madrid. A ella allegó una pequeña representación del alumnáu protagonista de la obra:

• Eduard Nikolas Melonuciu de 1º A
• Vera Martínez Fernández de 1ºB
• Antón García García de 2º A
• Selina Varela Blanco de 2º B

Acompañaos de dos tutores de los cursos participantes: Juan Diego Caunedo Herrero, tutor de 2º A; y Ana Isabel Santamaría Calderón, tutora de 1º A. Nel intre de la gala, el públicu asistente, pudo esfrutar non solo del espectáculu de la maga Amélie, sinón tamién del vídeu de la obra ganadora, “Aventura en La Boca del San Félix”.

Esta nun ye la primer vegada que'l colexu candasín participa nesti proyectu. Nel añu 2016 y cola obra “Aventura nel Corazón” empecipiaron la so andadura nesti programa educativu. Esi añu consiguen tamién el primer premiu, pero un premiu compartíu con un colexu de Madrid. Nesta edición 2019 el Colexu San Félix de Candás foi l'absolutu ganador del Premiu MimoKids.