La marca de promoción turística del Conceyu de Carreño recibe la reconocencia a la meyor iniciativa de marketing públicu d'Asturies.
L'Ayuntamientu de Carreño foi galardonáu col Premiu de Marketing d'Asturies, na so XII edición, na categoría de “Iniciativa de marketing públicu”. El premiu foi-y concedíu pol Club de Marketing d'Asturies, asociación profesional ensin ánimu d'arriquecimientu, que'l so oxetivu ye difundir la implantación de bones práctiques de marketing nel texíu empresarial asturianu.
El Conceyu carreñense fíxose merecedor d'esti galardón pol so apueste pola promoción del conceyu al traviés de la marca “Late Carreño”, que la so dinámica imaxe d'un corazón llatiendo vien ilustrando los distintos formatos d'espardimientu y publicidá del conceyu dende l'añu 2017: soportes de señalización turística en carreteres, mupis, valles de reconocencia a los deportistes olímpicos candasinos, presencia del conceyu en FITUR, etc.
Al actu d'entrega del Premiu (que tuvo llugar esti xueves, nel edificiu d'usos múltiples de la Fundación Llaboral de la Construcción, en Xixón) allegaron, en representación del Conceyu, l'Alcaldesa de Carreño, Amelia Fernández, la conceyala de Turismo Paula Cuervo, y el músicu candasín Pipo Prendes, que protagonizó xuntu cola poetisa murciana Madalena Sánchez Blesa el videoclip promocional del conceyu de Carreño que se presentó en FITUR.
Nel actu recibieron distinciones nes sos respectives categoríes les empreses “Anchoas Hazas”, “Supermercaos Más y Más”, “Magenta”, “Oviedo Congresos”, o la Fundación pola acción social “Mar de Niebla”, ente otros.