Castropolenses visiten llugares emblemáticos de la Villa de Candás

La conceyala, en funciones, de les árees d'igualdá y  bienestar de Castropol y un grupu de castropolenses percorrieron los llugares emblemáticos de la villa marinera y la ruta clariniana “Snob”.

Dellos son los llazos d'unión entre los conceyos asturianos de Castropol y Carreño, entre ellos la pasión pola llectura de los Clubes de Llectura de les Biblioteca Municipales, que de la mano de les sos bibliotecaries Manoli Busto y Carmen Dintén, creó un venceyu especial entre los dos conceyos. Un venceyu que quedó patente nes diverses actividaes conxuntes que les dos bibliotecaries entamaron estos años. Xornaes de Convivencia, equí y ellí, na que nun faltó, na de Candás, una visita con guía remembrando'l Candás-Rodillero de la novela “José” d'Armando Palacio Valdés. O la participación de los de “Candás” nos actos conmemorativos del Bicentenariu del fallecimientu de la escritora inglesa Jane Austin en Castropol.

Esta unión cultural nació de resultes de la Esposición “Semeyes de Llibru” de José Manuel Lozano. Esta esposición espúnxose tanto na Biblioteca de Castropol como na de Candás. Nella amuésase una serie de fotografíes de les persones integrantes del club de llectura que posaron énte la cámara, d'unos de los sos compañeros, con solu como atrezo un llibru.

Y en el día de güei, los llazos siguen estrechándose, con nueves actividaes, concretamente cola visita d'un grupu de persones de Castropol a la villa de Candas, acompañaos pola Conceyala, en funciones, d'Igualdá y Bienestar Social Teresa Dorado.

A les 10:30 hores la Conceyala de Turismu en funciones, Paula Cuervo, col telón de fondu de la estatua d'Antón “La Marinera”, dio la bienvenida al  grupu na Plaza Hermanos Helio con una pequeña introducción de la hestoria de Carreño y de la so villa capital. Nel percorríu posterior nun faltó l'antiguu faru, la farola” o Faru de la Peña de los Ánxeles, o la Peña Furada. Nin les distintes rutes clarinianas o la nueva “Ruta de los Oficios”, una y bones esa plaza ye escenariu de la ruta clariniana “Snob”.

Tres el recibimientu, la comitiva dirixóse escontra'l Puertu onde visitaron la Rula de Pescadores. De la mano de Mateo González, quién-yos esplicó les llabores que desenvuelven nel puertu y la confrería, según el pasáu marineru y conserveru de Candás.

De siguío, el grupu visitó unu de los obradores de la Villa que tienen el sellu de calidá de Les Marañueles como “Alimentos de Paraísu”. Ellí pudieron ver in situ como s'ellabora'l típicu postre candasín, amás de tastialo. Para siguir dando un paséu poles cais de la capital hasta llegar al Muséu Antón, onde la directora del mesmu, Dolores Villameriel, foi la encargada d'empone-yos na visita al centru. La visita incluyó la obra d'Antón y l'esposición temporal.

La visita cultural  remató con una recepción al grupu nel salón de Plenos del Conceyu de Carreño per parte de l'Alcaldesa en funciones de Carreño Amelia Fernández López. Moviéndose para rematar la xornada a unu de los establecimientos d'hostelería locales onde esfrutaron d'un menú a base de los productos de la mar y del valle de Carreño.