Frutu del alcuerdu de collaboración ente'l Conceyu de Carreño y el Consorciu de Tresportes d'Asturies, el Conceyu va formar parte, un añu más, del serviciu “Óptibus Rural” 2019.

Esti serviciu consiste na puesta en marcha de dos llínees de Tresporte Públicu, a partir del sábadu 6 de xunetu, que van percorrer tol conceyu, p'averar la zona rural a la villa de Candás. Que'l so oxetivu principal ye caltener mientres la temporada braniza determinaes rutes escolares mientres el períodu non lectivu. En total van ser 29 rutes les que'l Consorciu de Tresportes va poner en funcionamientu en 25 conceyos asturianos. De les cuálos, dos pertenecen al Conceyu de Carreño.

“La puesta en marcha nel 2018, d'estes rutes, respondió a una demanda histórica de la vecindá de la zona rural de comunicase, al traviés de tresporte públicu, con Candás. Ye una necesidá importante pa les parroquies rurales poder treslladase a la villa como cabecera del conceyu na que s'asientan los servicios y los comercios locales” señaló Manuel Noceda-Conceyal de la Zona Rural.

Dos van ser les llínees que van percorrer tol Conceyu rematando dambes na villa marinera siendo:

• Llínea Tamón (la Tabla)-Candás. Esta llínea va tener el so empiezu na parada de Chigre Casa Ángel pa siguir percorriendo les parroquies de Tamón-Ambás-El Valle-Quimarán-Prevera-Carrió-Albandi-Perlora y llegada a Candás.

Esta llínea va tener les siguientes paraes: Chigre Casa Ángel - La Tabla - Villar de riba - Villar de baxo - Bar Blanco - La Teyera - El Montico - El Cascayu (Vera del ríu) - Ambás 24 (Ambás Ilesia) – Nozalín – Casa Antona (El Valle) – Casa Duardo – El Fondo (Quimarán) – Prevera – El Riego – L'Empalme Pobláu de Albandi – Caicorrida – Casa Peñón – Casa Viña – Dormón (Perlora-Camping) – Perlora –Candás.

• Llínea Priendes - Candás. La llínea va tener el so empiezu en casa Gerardo na parroquia de Priendes pa siguir poles parroquies de Llorgozana-Perlora y llegada a Candás.

Esta llínea va tener el siguiente percorríu: Restaurabte Casa Gerardo – La Rebollada – Casa Falín (La La Rebollada 2) – Sebades – Encruz Posada – La Escuela (Llorgozana) – Coyanca – Encruz Campanal – Ponteo – Rodiles – El Prao (Perlora) – La Nozaleda – Perán  y llegada a Candás.

“La incorporación nel branu d'estes llínees supon amás d'ampliar la ufierta de tresporte públicu nel conceyu, un complementu a la iniciativa puesta en marcha col tresporte del cursu escolar 2017-2018. Al traviés del cual el vecinderu de la zona rural podía aportar a les places llibres d'esti tresporte ente selmana y averase a Candás. Con esta nueva iniciativa, esti tresporte amplíase a los sábados” comentó Noceda.

“Los trazaos propuestos respuenden a dos de les rutes que yá se faen nel tresporte escolar, correspondiendo una a una ruta del Colexu Poeta Antón, y la otra al Institutu d'Educación Secundaria.  Si mientres el so desenvolvimientu detectárense necesidaes distintes o cambeos nos horarios, estos van ser evaluaos pol Consorciu pa ver la so posible adaptación. Tres l'ésitu del pasáu añu dase continuidá a unes rutes que demostraron la so operatividá, siendo'l nuesu oxetivu'l so afitamientu” rellató'l Conceyal.

Esti serviciu especial, qu'interconecta el Conceyu, va dar empiezu a partir del próximu sábadu 6 de xunetu. Teniendo continuación los siguientes sábados del branu:

• Díes  6, 13, 20  y 27 de xunetu.

• Díes 3, 10, 17, 24 y 31 d'Agostu.

Siendo l'horariu d'ida a les 9:00 hores y el serviciu de vuelta a les 14:00 hores de los sábados.

El preciu del billete va ser de 1,55 € o 0,90 € al traviés de la Tarxeta de Tresporte del Consorciu.

“Estes rutes pioneres de tresporte públicu faciliten  l'accesu los sábados de branu a una serie de servicios como pue ser la visita al mercadín selmanal, que ufierta una variada serie de productos; la realización de la compra selmanal; dir a la sablera; esfrutar de la biblioteca, polideportivu; esfrute de los servicios de cuidu personal,… ensin tener que depender del vehículu priváu, evitando los problemes que trai'l so usu” remató Manuel Noceda.