Tres más d'una ventena d'hores de formación na Casa d'Alcuentros güei remató - cola entrega de diplomes a les persones participantes- la VI edición del Programa de Parentalidá Positiva”.
El Conceyu de Carreño, al traviés de la Conceyalía de Bienestar Social, en collaboración col Observatoriu de la Infancia y l'Adolescencia del Principáu d'Asturies, la Conseyería de Servicios y Derechos Sociales y el Grupu d'Investigación n'Intervención Educativa nel Ámbitu Familiar, Escolar y Social de la Universidá d'Uviéu, dende fai 6 años, entama estos talleres pa padres, madres y/o persones responsables de menores coles mires de fomentar una convivencia familiar positiva.
Al actu de clausura allegó en Representación del Conceyu de Carreño la Concejala de Bienestar Social, Paula Cuervo, acompañada de Rosa Rodríguez Manga, Trabayadora Social Responsable del Centru de Servicios Sociales Municipales y de la instructora del cursu formativu.
La “Parentalidá Positiva” refierse al comportamientu de los padres y madres encontáu nel interés cimeru de la infancia, que curia, que desenvuelve les sos capacidaes, nun ye violentu y ufierta reconocencia y orientación qu'inclúin l'establecimientu de llendes que dexen el so plenu desenvolvimientu. L'oxetivu de la xera de ser padres y madres ye'l de promover relaciones positives na familia, fundaes nel exerciciu de la responsabilidá parental, pa garantizar los derechos de la infancia y l'adolescencia nel so senu y promover el so desenvolvimientu y bienestar personal y social.
Frente al conceutu d'autoridá parental, el conceutu de responsabilidá parental plantega un control parental autorizáu basáu nel ciñu, el sofitu, la comunicación, l'acompañamientu y l'implicación na vida cotidiana de los fíos y fíes. Esta ye la forma de llograr una autoridá legitimada énte menores, basada nel respetu, na tolerancia, la comprensión mutua y na busca d'alcuerdos que contribuyan al desenvolvimientu de les sos capacidaes.
“Con estos talleres pretende dotase, facilitar a los padres y madres o otres persones adultes con responsabilidaes educatives familiares, l'alquisición d'estratexes personales, emocionales y educatives que-yos dexen implicase d'una manera eficaz na construcción d'una dinámica de convivencia familiar positiva, nel desenvolvimientu de modelos parentales fayadizos pa los neños y neñes. Con ello espérase que les families puedan prevenir y encarar de manera constructiva los sos problemes y conflictos cotidianos“ señaló Paula Cuervo – Conceyala de Bienestar social-.
La metodoloxía foi bien activa, amás de participativa, experiencial y basada en dinámiques de grupos coordinaos polos servicios técnicos del Centru Municipal de Servicios Sociales. estructuráronse n'once sesiones, con una duración caúna de 2 hores nes que se trabayó en cómo:
- Sentinos bien y seguros como padres y madres
- Consiguir que fíos y fíes siéntanse bien y confíen en nós y en sí mesmos
- Resolver conflictos con fíos y fíes
- Escuchar y dialogar con fíos y fíes pa entendenos meyor
- Entender el so comportamientu
- Poner llendes, normes y consecuencies al comportamientu
- Ameyorar la convivencia familiar
“Ye por ello que'l programa taba dirixíu a padres, madres y a toes aquelles persones adultes que tuvieren responsabilidaes parentales con menores a cargu. Y que la so residencia atópese nel Conceyu de Carreño, yá son 60 les families de Carreño que se beneficiaron d'esti programa. En palabres d'eses familia aprendieron la importancia de cómo se dicen les coses; a tratar de faer ver a menores qu'entienden cómo se sienten, qu'escuchar nun ye lo mesmo que tar d'alcuerdu, lo qu'ayudó a aprender a tolerar y a superar frustraciones” comentó Cuervo.
El Programa de Parentalidá Positiva, foi diseñáu por Dra Raquel-Amaya Martínez González, Doctora en Pedagoxía y Profesora titular de Métodos d'Investigación y Diagnosticu n'Educación del Departamentu de Ciencies de la Educación de la Universidá d'Uviéu. Al pie de el so equipu de trabayu encargóse de la formación de los profesionales de Servicios Sociales Municipales que fueron les persones encargaes del desenvolvimientu del mesmu.
Albandi
