Nun importa qué alloñaos países acueyan a los asturianos y les asturianes, nun importa'l tiempu trescurríu nin los avatares que la vida impónganos. La sola imaxe de la sidra rompiendo contra'l cristal remembra en cualesquier de nós una entemez de sensaciones sacando a la superficie de la memoria les emociones más personales  ya íntimes de cada persona. Porque'l líquidu dorao tien el so sabor, el so golor, los sos cantares, pero sobremanera, supon una gociosa celebración de grupu, de l'amistá y de la vida mesma.

So estes premises el 2 d'agostu, y como culminación de les Fiestes de San Félix les camisetes blanques y la ropa de Mahón van anubrir les principales cais de Candás cola celebración, del yá tradicional, rallye  de la sidra “De Culín en Culín”.

“Un rallye de la sidra que nesta edición va tener un calter bien especial, va ser un rally solidariu frutu del alcuerdu de collaboración algamáu ente la organización de l'actividá (Peñes Marineres) y la Fundación Sandra Ibarra de Solidaridá Frente al Cáncer. Al traviés del cual, caúna de les persones que participen nel festexu van donar en beneficiu de la Fundación 1€ de la cuota d'inscripción” señaló Paula Cuervo-Conceyala de Festexos-.

L'actu de presentación pública d'esta nueva edición del Rallye, celebróse nel Salón de Plenos del Consistoriu. El mesmu presidiólo, en representación del Conceyu de Carreño, como entidá collaboradora cola organización del Rallye, la Conceyala de Festexos, Paula Cuervo y la conceyala de Seguridá Ciudadana, Cecilia Tascón. Per parte de les Peñes Marineres, organizadores de l'actividá, acompañaron al coordinador del rallye, José Manuel  Rodríguez, una representación de les 99 peñes participantes nuna nueva edición del gran eventu.

“Mientres la presentación diose en roblar el conveniu de collaboración ente la organización y la Fundación Sandra Ibarra de Solidaridá Frente al Cáncer. Por aciu el cual, el 1 d'agostu, y col telón de fondu de la celebración del “L Festival de la Sardina”, fiesta declarada d'Interés Turísticu Rexonal, va faese entrega nel escenariu habilitáu nel Paséu de San Antonio, a Sandra Ibarra, fundadora y presidenta de la Fundación, d'una donación per parte de les persones participantes del rallye de la sidra de 2.300 €” siguió la Concejala.

La Fundación Sandra Ibarra ye una entidá ensin ánimu d'arriquecimientu dedicada al espardimientu pa la conocencia xeneral de la problemática que'l cáncer xenera nel ser humanu; a la orientación ya información a la sociedá en relación a la enfermedá; a la promoción d'actividaes tendentes a la so prevención, tratamientu y erradicación; y al fomentu de toes aquelles actuaciones que de manera directa, o indirecta, ayuden o redunden en beneficiu de les persones enfermes de cáncer o de los sos familiares y na atención de los mesmos.

“Ente los sos principios atópense la solidaridá, optimismu y compromisu  coles mires d'ameyorar  la calidá de vida de los y les pacientes y la so redolada, mientres y dempués del cáncer. Polo que dende va once años les sos actividaes céntrense nel financiamientu de beques d'investigación; impulsar campañes públiques  pa encarar el cáncer con positividad y rigor, non solo dende'l puntu de vista clínicu o científicu, sinón tamién social, favoreciendo que los medios de comunicación  destierren el llinguaxe bélicu; na humanización de la sanidá favoreciendo que les alministraciones públiques  xuntu coles organizaciones profesionales médiques ábranse al alderique y a la opinión de pacientes” prosiguió la conceyala de Festexos.

El Rally de la Sidra trátase d'un acontecimientu popular y eminentemente festivu al empar que defensor de la sidra asturiana como elementu significativu de la nuesa rexón. Y en el qu'añu a añu confirma'l so puxa y caláu na sociedá, calteniendo'l so númberu de participantes. Esti rallye “a cuerpu” poles cais de Candás destaca la diversión, l'ambiente de folixa,  la rises, la música, la solidaridá, y sobremanera  l'amistá. Un exemplu de convivencia.

“Nesta edición del 2019 van participar 2.300 persones, que formen parte de dalguna de les 99 Peñes Marineres inscrites nel eventu. Éstes van tastiar aproximao 9.200 botelles de sidra procedentes del llagar carreñense Sidra Peñón, nos cuatro paraes de les que consta'l rallye, acompañaes de los bollos preñaos ellaboraos poles panaderíes del Conceyu” avanzó Cuervo.

“Como vien siendo habitual, el percorríu va empezar na Fonte de los Ánxeles pa dempués llegar al Parque de Santarúa. Tres esta segunda parada y dempués d'un paséu poles cais Carlos Albo y Avda. Constitución llegará la Parque de Les Conserveres, tercer parada. De siguío, el pelotón va travesar la cai Rincón, Bernardo Alfageme, José Gonzalez Muniello hasta llegar a Pepe La Mata, onde s'atopa'l Paséu de San Antonio, cuarta y última parada. L'ambientación musical mientres tol percorríu del rallye va correr al cargu de la fanfarria “Pepe el  Chelo y sus marchosos” y de trés de los grupos que'l sábadu 3 y domingu 4 d'agostu van participar nel VI Festival de Fanfarries y Charangues. Memorial J.M Colón” remató Paula Cuervo-Edil de Festexos-.

“Mientres l'actu de presentación del rallye 2019 les Peñes Marineres roblaron un manifiestu de sofitu conxuntu a la cultura sidrera como patrimoniu inmaterial de la Humanidá. Manifiestu que se va completar el día del Rallye coles firmes de les persones que güei nun pudieron allegar al consistoriu. A la retirada de camisetes y pañuelos van roblar el manifiestu que vamos unviar dende'l Conceyu a la Conseyería pa la so inclusión nel espediente rexonal “ concluyó Cuervo.