El Conceyu de Carreño y l'Asociación d'Empresarios y Propietarios de Falmuria (ASPEFA) roblaron, na mañana de güei, un conveniu de Collaboración, ente dambes entidaes, que'l so oxetivu ye la llimpieza y el caltenimientu del Polígonu industrial de Falmuria.
Esti compromisu quedó reflexáu na firma per parte del Presidente de ASPE
FA, Víctor José Menéndez Fernández y per parte del Conceyu de Carreño, la so Alcaldesa, Amelia Fernández, del nuevu conveniu de collaboración, na mañana de güei llunes 5 d'agostu, nel Salón de Plenos del Conceyu de Carreño.
Cola firma d'esti conveniu'l Conceyu de Carreño comprométese a asumir el 60% de costu de los trabayos de llimpieza y caltenimientu de la área industrial del polígonu de Falmuria (Priendes) envalorándose necesariu la execución de cuatro llimpieces añales. Ente que ASPEFA va encargase de la contratación y supervisión del serviciu, asegurando que se cumple cola periodicidad de los mesmos.
Desque se constituyó l'asociación de ASPEFA ye habitual la collaboración pal funcionamientu y la meyora del polígonu de Falmuria ente ésta y el Conceyu de Carreño. Al conveniu de collaboración pa la llimpieza hai que suma-y toa una serie d'acciones, varies y variaes, qu'a lo llargo de los años, lleváronse a cabu. Ente les más destacaes atópense les obres de meyora d'accesibilidá y de señalización y ordenación del tráficu, nes que s'incluyía l'allugamientu del directoriu d'empreses o la creación d'un aparcamientu nel 2016; tres estes nel 2018-19 la redacción del Plan Integral de Seguridá de Falmuria y p'anguaño pretende llevase a cabu les meyores na rede de hidrantes, concretamente cola creación d'un nuevu puntu y la reubicación de los esistentes.
Amás a estes actuaciones destaca les que dende la Federación de Polígonos Industriales d'Asturies fáense pa sofitar la meyora continua los polígonos, como ye'l casu de la creación y puesta en marcha d'un Plan Mediu Ambiental del polígonu de Falmuria, que'l so fin ye la realización d'un conxuntu d'acciones p'amenorgar l'impactu ambiental de les actividaes de les empreses y de la mesma urbanización del polígonu.
Na actualidá'l Polígonu de Falmuria ta formáu por 59 empreses de distintu ámbitu y sector. Ellí tán instalaes empreses de moblame, alimentación, imaxe y soníu, ociu y entretenimientu, servicios funerarios, de moda, d'industria, de llar, de construcción, etc…
Albandi
