Nel Día del Comerciu que, añalmente, celebra la Unión de Comerciantes del Principáu d'Asturies, güei, 6 d'agostu, cinco comercios de Candás fueron homenaxaos pola so dilatada trayectoria dientro de la organización al cumplir 25 años como miembros acomuñaos de la Unión de Comerciantes d'Asturies. 

L'actu tuvo llugar na Sala Anfiteatru del Palaciu de Congresos de Xixón allegando en representación del Conceyu de Carreño la so Alcaldesa, Amelia Fernández López.

Una reconocencia al papel del comerciu nes ciudaes, pueblos, villes,… como elementu integrador, vertebrador y xenerador d'empléu. 

Los 5 comercios de Carreño, que dende 1994, tán acomuñaes a la Unión de Comerciantes  del Principáu d'Asturies, son:  

Electrónica Rubio

Xera

Muebles Santarúa

Yedra Floristas

Candás Sport

La Unión de Comerciantes del Principáu d'Asturies ye una asociación empresarial, creada en 1977, qu'arrexunta a Pymes de comerciu minorista y servicios, siendo la entidá más representativa d'esti sector económicu en tola Comunidá Autónoma.

“Dende l'añu 2008  y sofitáu sol conveniu de collaboración esistente ente'l Conceyu de Carreño y l'Unión de Comerciantes, Candás cuenta con un Centru Comercial Abiertu del que participen empreses de comerciu y servicios nes actividaes del mesmu. Un proyectu común nel qu'ufiertar a los comercios  aspeutos rellacionaos cola formación, ayuda a la xestión, aforru de costos y servicios xenerales amás de la realización d'acciones conxuntes de promoción que suponíen y suponen xuna reactivación del comerciu y de la economía local” señaló Amelia Fernández López-Alcaldesa de Carreño.

“A lo llargo d'esta década de collaboración públicu-privada, delles son les actividaes promocionales que se llevaron a cabu col únicu oxetivu de poner en valor daqué tan nuesu como ye'l pequeñu comerciu, el comerciu de proximidá. Ensin dir más allá, sorteos de cheques regalo, regalos directos coles compres, sorteos de servicios de turismu y ociu, que lo llargo del  añu entama l'asociación a lo qu'hai que sumar el Concursu d'Escaparates Navidiegos o d'Antroxu, o l'actividá d'ociu infantil llevaos a cabu mientres el mes d'avientu “La Fábrica de Sueños” na Antigua Fábrica d'Ortiz, l'allumáu navidiegu o más apocayá, nel mes de mayu, la celebración del primer desfile de moda inclusivu nel que participaron tiendes de Candás”– prosiguió L'Alcaldesa. 

 “Nos próximos meses vamos peracabar cola Unión les acciones formatives sobre marketing dixital y redes programaes anguaño. Tamién vamos peracabar los preparativos pa dar un bon serviciu y promocionar el comerciu local mientres la celebración del IV Parlamentu Rural Européu en Candás, el próximu mes de Noviembre y la divulgación del ticket rural qué traviés de los fondos Leader podrá solicitase, ente otros conceyos, en Carreño. Ye una ayuda económica a la puesta en marcha d'actividaes non agrícoles nes zones rurales (Ticket rural), y consiste  n'un importe a tantu alzáu a conceder pola creación d'una empresa. Van Poder solicitar la mesma, aquelles persones físiques que lleven siquier trés meses desemplegaes, que creen una empresa a títulu individual  na que siquier se xenere'l so puestu de trabayu y que nun hayan tao daos d'alta como autónomos na mesma actividá na que se solicita l'ayuda nos postreros trés años. L'ayuda resulta incompatible con otres ayudes similares, y en particular coles del conocíu como “ticket del autónomu” que pueda impulsar l'alministración pública en materia d'empléu. L'ayuda nun ta venceyada a la xustificación de nengún gastu o inversión, solo al caltenimientu de l'actividá y al cumplimientu del Plan Empresarial que tendrá de presentase pa la solicitú de l'ayuda. El Plan Empresarial tendrá de demostrar la viabilidá económica y técnica de la empresa y el beneficiariu tendrá de dedicase a tiempu completu a l'actividá prevista nel mesmu. Anguaño, l'ayuda ye de 25.000 €, suxeta al réxime de mínimos. El pagu va tener calter tresañal y va abonase en trés tramos del 30%, 30% y 40% n'años consecutivos” - concluyó la rexidora.