A partir de la segunda selmana d'esti mes d'Ochobre, y pol plazu de 2 meses, el módulu d'Operaciones Auxiliares d'Acabaos Ríxidos va encargase d'asitiar trés aparatos d'exercicios pa persones adultes nes instalaciones del Local Social del Pobláu de Albandi.
Trátase del allugamientu d'un aparatu de cintura (que refuerce l'axilidá y flexibilidá de la zona lumbar), un timón (refuerzo de la musculatura de miembros cimeros) y unu de masaxe (relaxa la tensión muscular de cadril y llombu), y que sirven como complementu de los aparatos instalaos n'El Tranqueru.
Amás, van intervenir nel Parque Infantil, allugáu na isleta d'ingresu al Pobláu, estructurando al mesmu en dos zones d'usu claramente estremaes, vertebraes al traviés d'un senderu piatonal que va ser por onde s'apuerte a caúna d'elles.
D'esta miente, xenérense, per una parte, una área social y de descansu, y por otra poténciase la zona infantil.
Con respectu al primeru, va crease una escampada de forma curva, de formigón impresu, que los sos llaos conformen un bancu continuu con acabáu en azulexáu y la sienda piatonal, tamién executada en formigón impresu.
Esta zona va completase con un equipu de dos pedales y bancu.
Na zona infantil va crease una solera de formigón sobre la que se va establecer un pavimentu amortiguador fayadizu a la superficie de les árees de xuegu absorbedores d'impactos y nella, va instalase un nuevu xuegu (balancín de 4 places) creando un circuitu xuntu al tobogán y al xingadoriu esistentes.
Estes obres van sirvir pa la meyora de los equipamientos n'espacios públicos de Carreño.
Albandi
