Nun establecimientu hosteleru de la contorna rexuntóse'l vecinderu de la parroquia d'El Pieloro pa celebrar el so alcuentru añal. En torno a 60 persones xuniéronse al festexu.
A les 13 h. celebración llitúrxica oficiada pol cura párrocu José Manuel García y de siguío comida añal. Antes de dar empiezu a la mesma guardóse un minutu de silenciu polos finaos de la parroquia y otru especialmente n'alcordanza de “Rogelio El Campón” natural de Zanzabornín fináu fai unes hores ensin cumplir 60 años.
Nesta edición los mayores homenaxaos, ye dicir les persones de más edá presentes nel alcuentru vecinal fueron Gabino González y María Luisa Menéndez.
Tamién hubo un tiempu pa destacar a los más nuevos de la parroquia Bruno Prendes Fernández, que recibió la distinción cola so hermana Martina y otru menor de la parroquia Alejandro González, nietu del homenaxáu. L'Asociación de ganaderos apurrió una placa a María José García, fía de la homenaxada, por ser la precursora d'esti alcuentru vecinal. En representación del consistoriu carreñense allegaron l'Alcaldesa y el conceyal de la zona rural de Carreño, Manuel Noceda. Darréu curtia glosa de la hestoria vital de los mayores homenaxaos:
GABINO GONZÁLEZ GARCÍA.
Nació en Zanzabornin en Noviembre de 1941, fíu de José González más conocíu como “Pepe Gabino” y de Josefa García , conocida como “Josefa Bartuelo”. Ye'l mayor de dos hermanos . En pasando la so infancia ente los llabores del campu y l'escuela d'El Pieloro , qu'abandonó a los 14 años pa formar parte de la saga familiar y dedicase a lo qu'anguaño sigue siendo la so pasión y lo que foi la so manera de vida, la ganadería y agricultura. Con 31 años casóse con Maria josefa Alvarez, conocida como “Fini”, a comuña siguieron cola esplotación familiar dedicada a l'agricultura y ganadería y con grandes esfuerzos pasaron tola so vida dedicaos a la so familia en cuerpu y alma como pilastra prioritaria y en pasando difíciles momentos, cola perda a edá temprana d'un fíu, na actualidá pasen los sos díes colo que dicen ser el so mayor arguyu y ayalga, los sos dos nietos, fíu y nuera. Namoráu de la so parroquia y de les sos xentes compaxina los sos queferes diarios del campu cola Asociación de ganaderos y na organización de les fiestes cola mocedá de la parroquia, actividaes que lu caltienen con gran vitalidá ya ilusión.
MARÍA LUISA MENÉNDEZ GONZÁLEZ
“Luisa Patriciu” como ye conocida pol vecinderu de la localidá nació n'El Pieloro en mayu de 1934. Ye fía de Manuel de Patriciu y Josefa Salguero, la mayor de dos hermanes y ensin hermanos varones, enfrentóse de bien moza a les llabores d'agricultura y ganadería. Estudió na escuela d'El Pieloro y cursó corte y confección pero decidió siguir el camín del so padre y apasionada de la tierra sigue mirando la lluna pa les colleches. Con 22 años casóse col que sería l'amor de la so vida Silverio Cayetana. A comuña siguieron cola ganadería familiar y sacaron adelantre a les sos trés fíes que colos sos xenros diéron-y cuatro nietos. Tar arrodiada d'ellos ye mayor ayalga. Ye güei la muyer viva que más años lleva n'El Pieloro pos dende aquel 34 nunca abandonó la so casa familiar. Namorada del so pueblu y estimosa de los sos vecinos presume onde quiera que va de ser d'El Pieloro. A pesar de nacer n'otru sieglu demostró gran capacidá d'adaptación al mundu modernu lo que la caltien vital amás de viva. Con llurdios na piel del sol cuando recuerda la so vida nun puede evitar esbozar una sorrisa.
Albandi
