Minutu de silenciu nel día européu de les víctimes del terrorismu

Esti llunes, día 11  de marzu, cumpliéronse 15 años dende aquel triste día nel que la barbarie y la sinrazón terrorista acabaron cola vida de 193 persones en Madrid, dexando un imborrable rastru de dolor nuna ciudá y nun país enteru. Un actu criminal condergáu por instancies de too el mundu, a les que la FEMP y el movimientu municipalista súmense con un compromisu yá manifestáu antes d'aquel día y reafitáu de magar, énte manifestaciones terroristes de cualquier naturaleza.
 
Agora, nesti decimoquintu aniversariu, por eses víctimes, por toles que lo fueron antes y por toles que vinieron dempués, la FEMP convidó formalmente a los Gobiernos Locales españoles a manifestar de nuevu esi compromisu tal que tantes vegaes se fixo: cola convocatoria d'un simbólicu minutu de silenciu a les 11 de la mañana del 11 de marzu, a les puertes de los Conceyos.

El 11 de marzu, Día Européu de les Víctimes del Terrorismu, un momentu pa honrar la memoria de quiénes yá nun tán, pa caltener vivu la so alcordanza y pa reconocer que la democracia y la so defensa son los únicos caminos escontra la llibertá y los derechos de les persones.

Énte'l pidimientu formuláu pola FEMP, nel Conceyu de Carreño guardóse - delantre del mesmu - un minutu de silenciu a les 11 del día 11 de marzu, pa recordar a les víctimes, repulsar y condergar cualquier tipu de violencia terrorista.