«Si algún día venís a la provincia de Asturias no os vayáis sin echar una ojeada a Rodillero. Es el pueblo más singular y extraño de ella, yá que non el más hermoso...»
135 Años dempués ver la lluz per primer vegada, la hestoria d'amor inocente entre José y Elisa volverá percorrer les cais, rincones y places de la villa marinera de Rodillero cola reedición per parte del Conceyu de Carreño de la novela “José” d'Armando Palacio Valdés. Novela emblemática pal conceyu de Carreño.
La presentación de la reedición de la novela “José” va tener llugar esti Xueves, 12 de marzu a les 19:30 hores na Casa de la Cultura de Candás. Un actu que va tar presidíu pola Alcaldesa de Carreño, Amelia Fernández y que va cuntar cola participación del autor d'esta nueva edición, Francisco Trinidad; según representantes de los conceyos participantes na iniciativa cultural, encabezaos pola Vice-Alcaldesa de Llaviana, Inés García y José Marcelino García, poeta y escritor candasín estudiosu de la obra de Palacio Valdés.
Nel intre del mesmu, el públicu asistente va poder esfrutar de la mano de Maribel Rodríguez, Manuel Rivero y Gemma de Luis, so la dirección d'esta postrera, de la representación d'una de les escenes de la obra nes que coinciden la “Señá Isabel” y “Don Claudio”(padres de Elisa) cola madre de José (Teresa).
Corría'l mes de febreru de 1885 cuando nes estanteríes de les llibreríes apaez la novela “José” del asturianu Armando Palacio Valdés. Una primer edición que foi editada por cuenta del escritor na madrilana imprenta de Manuel Ginés Hernández nun volume de 269 páxines. Y qué a día de güei, unu d'esos exemplares, fuelga na Biblioteca Municipal “Carlos González Posada” de Candás gracies a la donación del vecín Francisco Javier Méndez Valdés.
En “José, Armando Palacio Valdés recrea la vida cotidiana de los habitantes d'un pueblu marineru asturianu en 1885. Desenvolviéndose nel pueblu ficticiu de Rodillero, un pueblu definíu pol autor como «no es gentil, pero es sublime, lo cual importa más».
Ye una novela realista, protagonizada polos homes y les muyeres que la so vida centróse na mar como lu amuesa esti párrafu de la novela: «Los hombres salen a la mar por la mañana o a medianoche, según la estación, y vuelven por la tarde: las mujeres se ocupan en llevar el pescado a les villas inmediatas, o en tostarlo para escabeche en las fábricas, en tejer y remendar les redes, coser las velas y en los demás quehaceres domésticos». Una novela que nos recuerda aquel Candás de les fábriques de conserva, de les salazones, de la llucha constante de los nuesos güelos y güeles para sacar alantre a les sos families naquella dómina tan dura.
Una novela que foi aceptada gratamente pola crítica y el públicu de la dómina. Entre toles obres de Palacio Valdés ye la que más vegaes se tradució, publicóse en 1900 en llingua inglesa. Amás, en 1925 foi llevada al cine so la dirección de Manuel Noriega.
Armando Palacio Valdés nació'l 4 d'ochobre de 1853 n'Entrialgo, Llaviana. Educaóse n'Avilés hasta 1865, en que se tresllada a Uviéu a vivir col so güelu pa estudiar el bachilleratu. Nesa ciudá ye onde conoz y forxa una especial amistá con Leopoldo Alas Clarín y Tomás Tuero. En llogrando'l so títulu de bachiller n'Artes en 1870, decidió siguir la carrera de Lleis en Madrid, que concluyó en 1874. En 1885 naz el so primer fíu al empar que fina la so primer esposa y publica la novela “José”. Foi miembru de la Real Academia de la Llingua y en dos ocasiones tuvo a puntu de consiguir el Nobel de Lliteratura. A la de encuadralo dientro d'una corriente lliteraria, Palacio Valdés, amuésase bien cercanu a la Xeneración del 98 nel so ataque contra l'atrasu y l'inxusticia social de la España de principios del sieglu XX.
Ye un gran ceador de tipos femeninos y ye diestru na pintura costumbrista como lo demuestra en “José“, al igual que sabe tamién representar personaxes secundarios. Al contrariu que otros autores concede al humor un papel importante na so obra. La so obra foi bien traducida, especialmente al inglés, ya igualmente apreciada fora d'España.
Les primeres esquises de “José” tuvo d'iguales Palacio Valdés en redol al branu de 1883, en Candás, onde folgaba y alternaba en tertulies y casinos, pero onde, coles mesmes, paez ser que s'interesa pel mundu marineru, participa nes xeres pesqueres, toma notes y apella a los pescadores por que-y faciliten toa suerte de detalles, anécdotes y noticies sobre la so actividá… según palabres de José Luis Campal en “José". La novela marinera d'Armando Palacio Valdés”.
L'actu va tener llugar esti Xueves 12 de marzu a les 19:30 hores na Casa de Cultura de Candás, siendo la entrada llibre y gratuita hasta completar l'aforu disponible.
Al rematar el mesmu agasayaráse a les persones asistentes con un exemplar de la nueva reedición de la novela “José” patrocinada, entre otros, pol Conceyu de Carreño.
Albandi
