La representación del movimientu asociativu femenín del conceyu axuntóse na Casa d'Alcuentros para peracabar el programa previstu en redol al 8 de Marzu nel conceyu.
“Como tolos años les actividaes que se programen non se circunscriben a una fecha concreta, el día Internacional, sinón que son tresversales y desenvuélvense a lo llargo de too l'añu”- señaló Cecilia Tascón, edil d'Igualdá.
El primer bloque d'actividaes enmárcase na XVII edición de les Xornaes de Coeducación “D'igual a igual” que se van presentase el 20 de marzu nel salón de plenos municipal coles entidaes participantes. La programación prevista va executase del 5 de Marzu al 5 de Mayu nel “IES Candás” y nos Colexos Públicos “Poeta Antón” y “San Félix” col oxetivu principal de promover la igualdá d'oportunidaes entre muyeres y homes y de la mesma, sensibilizar a la población más moza sobre violencia de xéneru.
Esti Sábadu, 7 de Marzu a les 16:30 hores nel CIR Monte Areo l'Asociación de Muyeres Rurales Nosotr@s va celebrar la so asamblea añal de socies.
“Pal Domingu, 8 de Marzu, Día Internacional de la Muyer - pela mañana- cola incorporación del Candás CF al programa municipal d'actividaes previstes les asociaciones de muyeres de Carreño van dar llectura a un manifiestu nel Campu La Mata. Va Ser a les 11:30 hores, xustu antes del entamu del partíu que van arbitrar muyeres y va concluyir con un Brinde pola Igualdá” – afirmó Tascón.
“Mientres el mes de Marzu la programación del Teatru Prendes tamién va tener en cuenta la conmemoración del 8M. va proyectase en Candás la película sobre acoso sexual “L'escándalu (Bombshell)” este fin de selmana ( del 6 al 8), la siguiente fin de selmana va tener llugar l'IV Certame Xuvenil d'Habaneres y Cantar Marineru de Candás, tan venceyáu al trabayu femenín nes fábriques de conserva. Va Ser el sábadu, día 14 a les 19:30 h. El xueves, día 19 a les 20 hores dientro del CICLU DE CINE OTRES MIRAES proyectaráse la película de non ficción inspirada na lluanquina Josefina Carrera “Cuca” (semeya d'una muyer). Dicha película tuvo 7 nominaciones na 34 edición de los Premios Goya. El Vienres, 27 a les 21 hores representación teatral de “Lisistrata de Aristófanes” (Teatru ECA) na que se plantega la fuelga sexual de les muyeres. La última fin de selmana de Marzu, 28 y @9, programóse la película “Judy” na que l'actriz Renée Zellweger llogró'l Oscar como meyor actriz ” - prosiguió la conceyala
“El Martes 24 de Marzu a les 18:30 hores na Casa de Cultura de Candás vamos presentar la Guía de Rutes Saludables apurriendo un exemplar gratuitu a cada asistente. El sábadu, 28 de Marzu, a mediudía, en Valdés Pumarino, en collaboración cola Asociación d'Escritores d'Asturies, que preside Esther García López, la Escuela de Música “Miguel Barrosa” de Carreño y los establecimientos d'esa cai celebrará'l Recital Poéticu en sesión “Nós conversos por elles”. Homes y muyeres van recitar testos que cavilguen sobre la igualdá na Plaza de Les Candases, en casu d'agua l'actividá treslledaráse al Galley Pub” - indicó Tascón.
“Nel mes d'Abril va ser l'actu d'entrega del galardón Muyer del Añu nel Teatru Prendes de Candás y el Sábadu 25 d'Abril l'asociación de muyeres rurales “ Nosotr@s” tien programáu'l Viaxe Cultural a ASIEGU, Pueblu Exemplar d'Asturies 2019. Les inscripciones tán abiertes y el preciu que fixaron ye de 30 € para les socies” – detalló la edil.
“En Mayu, el día 8 vamos participar coles muyeres de Tiempu Propiu, na XIV Xornada d'Alcuentru Añal de Socies de l'Asociación de Muyeres con Tiempu Propiu. Pola Siero cueye'l testigu de Carreño y exerz anguaño de conceyu anfitrión” – esplicó la conceyala.
“Cada añu xunímonos a la celebración del 8 de marzu, Día Internacional de la Muyer, pero tolos díes del añu trabayamos dende l'ámbitu municipal tratando de sofitar el progresu y l'igualdá en tolos ámbitos profesionales, sociales, culturales y deportivos” – remató Cecilia.
Albandi
