El Conceyu de Carreño refuerza'l serviciu municipal de Llimpieza Viaria cola dotación de nueva maquinaria que va ayudar a la realización de la llimpieza y desinfección del moblame y de los espacios públicos.

“Pa la realización de los trabayos de Llimpieza Viaria el Serviciu d'Obres dispon de los medios personales y mecánicos necesarios, anque col pasu de los años siempres se precisa la renovación o alquisición de nueva maquinaria pa llevalos a cabu. Dende la Xefatura d'esti serviciu informósenos de la necesidá d'adquirir una serie de maquinaria pa poder siguir emprestando'l serviciu en óptimes condiciones, ameyorando la capacidá y calidá del serviciu. Presentósenos un proyectu que vimos bien y de esta forma adquirióse un depósitu con una capacidá de 3.000 llitros xuntu con un grupu de presión p'acoplalo a unu de los vehículos municipales pa reforzar la llimpieza viaria del Conceyu” señaló Jesús Varela-Conceyal d'Obres.

“La compra d'esta maquinaria va facilitar les llabores de llimpieza al personal municipal. Con esti nuevu depósitu y el grupu de presión les llabores de llimpieza pueden realizase de dos formes distintes según sían les necesidaes de llimpieza, del moblame urbanu o'l tipu de cai o vía a llimpiar, o si quier faese una llimpieza más agresiva” prosiguió'l Conceyal.

D'esta forma les posibilidaes a la d'efectuar la llimpieza que nos ufierta la nueva maquinaria son:

• Pulverización automática por aciu una vara ensertada na parte trasera del vehículu, pa lo que son les víes, cais, carreteres, caminos,…amás de dos pistoles manuales pal moblame urbanu.

• Baldéu a presión, con una o dos mangones.

“Una vegada que'l sistema instalóse nel vehículu municipal y tres les comprobaciones pertinentes empezóse cola llimpieza de les marquesines de too el Conceyu y les bateríes de contenedores, reforzando la llimpieza efectuada por COGERSA. Nestos dos casos primero fíxose un baldéu a presión colos mangones y de siguío llimpiáronse estos elementos coles pistoles manuales” comentó Varela.

“Con esti nuevu sistema y vista la resultancia llograda tamos embaraxando ampliar el depósitu n'otros 3.000 llitros más, hasta algamar los 6.000 llitros, de cara a poder baldiar y llimpiar d'una forma más eficaz los viales municipales mientres tol añu, y non yá mientres la dómina veraniega. Esta inversión tendría d'encetase nel presupuestu municipal d'anguaño ” remató'l Conceyal.