La Conseyería de Mediu Rural y Cohesión Territorial publicó nel BOPA la convocatoria d'ayudes pal añu 2020 correspondiente al programa LEADER y que van ser tramitaes al traviés del Grupu d'Acción Local la “Asociación pal Desenvolvimientu Integráu del Centru d'Asturies Periurbanu (ADICAP)”.
La convocatoria tien un presupuestu total de 731.000 € pa los años 2020, 2021 y 2022 y ta distribuyíu por partíes presupuestaries de la siguiente forma: pa empreses privaes: 558.000,00 €; entidaes locales: 142.000,00 € y entidaes ensin ánimu d'arriquecimientu: 31.000,00 €. Les ayudes tán cofinanciaes pol Fondu Européu Agrariu de Desenvolvimientu Rural (Feader) nun 80%, el Principáu d'Asturies nun 14% y l'Alministración Xeneral del Estáu nun 6%.
El plazu pa la presentación de solicitúes d'ayudes ye de 30 díes dende la publicación nel BOPA. Toles solicitúes d'ayuda tán suxetes de primeres de concurrencia competitiva.
Van Ser subvencionables los proyectos empresariales tantu de nueva creación como d'ampliación o modernización que s'alluguen en Carreño, Gozón y zona rural de Corvera y Llanera y que s'enmarquen en delles de les siguientes midíes del programa Leader: Inversiones n'esplotaciones agrícoles, ayudes a industries agroalimentaries, ayudes pal establecimientu de sistemes agroforestales, puesta en marcha d'actividaes non agrícoles nes zones rurales (ticket del autónomu) y ayudes pa inversiones a la creación y desenvolvimientu d'actividaes non agrícoles. Tamién son subvencionables inversiones non granibles promovidas por entidaes locales y entidaes ensin ánimu d'arriquecimientu dirixíes a formación, meyora del patrimoniu cultural y natural, enerxíes anovables y aforru enerxético, banda ancha rural, infraestructura turística y servicios básicu locales incluyíos ociu y cultura.
Nesta convocatoria'l Principáu d'Asturies reforzó les ayudes pa garantizar el soporte necesariu al texíu productivu y social del mediu rural y garantizar la continuidá de l'actividá nun sector esencial pal suministru d'alimentos a la población.
Ente les principales novedaes d'esta nueva convocatoria al respective de les anteriores ye que se simplifiquen los trámites alministrativos p'aportar a les ayudes, amóntase l'ayuda del ticket rural de 25.000 € a 35.000 €, dellos proyectos d'inversión agroalimentaria van poder recibir hasta 300.000 € d'ayuda y l'introducción de cambeos pa impulsar proyectos nel turismu rural, la industria agroalimentaria, la hostelería o'l pequeñu comerciu, destinaos a afaese al nuevu escenariu del Covid-19, pa poder dotase de medios de protección o otres venceyaes al impulsu d'estratexes de comercialización y comunicación dixitales como comerciu online.
Albandi
