El Consistoriu de Carreño sacó a
llicitación el serviciu de catering del comedor del Colexu Públicu
d'Educación Infantil San Félix de Candás. Rematando'l plazu pa la
presentación d'ufiertes poles empreses mañana vienres 29 d'abril.
L'oxetu de la llicitación ye un
contratu de servicios por un importe de 107.761,60 euros, por aciu
una tramitación urxente y abierto. Nel cual les empreses tienen 8
díes naturales a partir del día siguiente a la so publicación nel
Boletín Oficial del Principáu d'Asturies (BOPA 20-IV-2017) pa
presentar les ufiertes.
El plazu de vixencia del serviciu va
ser dende'l primer día lectivu siguiente a la firma del contratu
hasta l'últimu día lectivu del calendariu escolar del mes de xunu
de 2017 y mientres el cursu escolar 2016-2017.
La prestación del serviciu de Catering
va consistir en dos servicios:
·Serviciu de comedor.
·Serviciu d'almuerzu.
El serviciu de comedor va tener una
duración de dos hores, ente les 14:15 y les 16:15 h. d'ochobre a
mayu, ente que los meses de xunu y setiembre va ser de 13:15 a 15:15
hores.
La confección de los menúes tendrá
de tar sofitada por profesionales na materia y/o siguir la estratexa
NAOS, y va constar de dos platos (primeru y segundu), postre, pan y
agua.
Si a lo llargo del cursu escolar
2017/2018, hubiera demanda familiar pa emprestar el serviciu
d'almuerzu, la empresa axudicada va tener que faese cargu del mesmu.
Este va dar empiezu a les 7:15 hores, rematando dos hores más tarde,
a les 9.15 hores. L'almuerzu va consistir nuna pieza de fruta o
zusmiu, lleche con/ensin cacáu o yogurt, galletes o tostaes o
ceberes.
“Cola puesta en marcha d'esti
serviciu de comedor nel Colexu Públicu San Félix atiende una
demanda bien deseyada per parte de los padres y madres del alumnáu.
Dende les alministraciones públiques trabayamos pa dar servicios que
la ciudadanía demanda. Y en el casu de la infancia de sobremanera,
dando una reblagada n'ares de la conciliación familiar, nun intentu
d'ameyorar la calidá de vida de los nuesos neños y neñes. Esto foi
frutu del trabayu común y del alcuerdu del Ayuntamientu de Carreño,
la Conseyería d'Educación del Principáu d'Asturies y la Dirección
del Colexu San Félix de Candás” -comentó Cecilia Tascón,
Conceyala d'Educación.
Más información nel Perfil del
Contratante na páxina web www.ayto-carreno.es o nel Serviciu de
Contratación, Bienes y Asuntos Xenerales del Conceyu de Carreño
asitiáu na cai Santolaya, nª 1-3 de Candás o nel teléfonu
985870205 / 206.